Manta Ray llanta les sos "Torres de Electricidad"

El grupu asturianu de post-rock Manta Ray espubliza esti 31 de xineru'l so sestu discu, que vien entituláu como "Torres de electricidad". El grupu, que tien el so ñeru en Xixón, vuelve a repetir cola casa de discos Acuarela y con esti CD da una pasu más na interminable cata d'una personalidá sonora y artística.

El discu ígüenlu 10 cantares que quieren frayar col discursu musical más nidiu que gastaben enantes. L'oxetivu ye ser agora más duros, con cantos y orgánicos, "onde la influencia d'otros grupos dílese gracies a la personalidá achaplante del grupu" como ellos mesmos describen. El grupu volvió a enfotase na producción de Kaki Arkarazo, que yá trabayo cola banda nos sos discos anteriores "Estratexa" y "Esperanza", y tamién repitieron estudios de grabación usando los Estudios Gárate del mesmu Kaki en Guipuzkoa. El discu tamién pasó peles manes de Roger Seibel, que s'encargó de la masterización, y del artista asturianu Ramón Isidoro que diseñó la portada de mesmu.


Esti "Torres de Electricidad" llega güei a les tiendes afondando na carrera d'una de les bandes más importante de la música independiente nel estáu español. Pa sentir dalgo que lo que se fizo y que ta faciendo na escena de la música más moderna convidamos a los nuesos llectores a conectar cola emisión de la canal d'Asturies.com radio dedicada a la música independiente.