Manos Limpias denuncia a Méndez y a Toxo polos piquetes

|

El sindicatu de calter derechista Manos Limpias presentó una denuncia contra los secretarios xenerales d'UXT y CC.OO, al consideralos "inductores, cooperadores y cómplices" de les acciones de los piquetes na fuelga xeneral.

Manos Limpias denuncia tamién, aparte de a Cándido Méndez Rodríguez d’UXT y Ignacio Fernández Toxo de CC.OO, a los autores materiales de los piquetes coactivos, al secretariu xeneral de la comisión executiva d'UXT de Madrid, José Ricardo Martínez Castroy, y al secretariu xeneral de CC.OO, de Madrid, Javier López, por presuntos delitos de coacciones, amenaces y lesiones.
  
"Por cuenta de la güelga xeneral, celebrada'l 29 de setiembre del 2010, produxéronse en Madrid y Comunidá una serie d'incidentes y fechos, qu'a xuiciu del sindicatu denunciante, son constitutivos  d'illegalidaes penales, d'amenaces, coacciones y lesiones", señala la denuncia.
  
En concreto, Manos Limpias considera que toos ellos fueron los responsables de les acciones sindicales que tuvieron llugar nes cocheres de la EMT de Madrid y en Mercamadrid, lo mesmo que de les "coacciones y amenaces" a los comerciantes de la zona centro de Madrid.
  
Amás, el sindicatu denuncia l'incumplimientu de los servicios mínimos per parte de Telemadrid y les lesiones sufríes por dellos axentes de la Policía Nacional, a los qu'hubo qu'hospitalizar.
  
Manos Limpias apoya la so acusación contra los líderes d'UXT y CC.OO nes manifestaciones feches nos díes anteriores nes qu'afirmaron qu'había que "parar Madrid poles bones o poles males" y que nun contaben cumplir los servicios mínimos al consideralos "abusivos".

Manos Limpias y la estrema derecha

Manos Limpias ye un sindicatu español fundáu en 1995 nel ámbitu de los empleaos de la función pública. Anguaño carez de representación institucional, pero destaca por presentar numberoses demandes xudiciales contra partíos d’izquierda y nacionalistes. El so dirigente, Miguel Bernad Remón, foi el responsable de la organización ultraderechista Frente Nacional. Sicasí, Manos Limpias niega’l so carácter ultra.
 

Contador Estadistiques