Manifiestu contra l’autovía de La Espina a Ponferrada

Cerca de venti grupos ecoloxistes y entidaes de distintu calter roblaron un manifiestu contra la construcción de l'autovía ente La Espina y Ponferrada, una infraestructura que va pasar pel Parque Natural de les Fontes del Narcea, Degaña ya Ibias causando un grave impactu ambiental.

Aprovechando'l plazu d'alegaciones, el colectivu unvió carta al presidente autonómicu Álvarez Areces, al conseyeru de Mediu Ambiente, la Viceconseyera y al director xeneral de Recursos Naturales pidiéndo-yos que nun se remocique'l Plan Rector del Parque de les Fontes del Narcea pa permitir la infraestructura, que pidiere'l conceyu de Cangas del Narcea en plenu por unanimidá de tolos partíos representaos na casa conceyu.

Los grupos conservacionistes consideren que dexar abierta la puerta a la construcción d'autovíes o autopistes dientro d'un espaciu declaráu ye una midida qu'afala la "desnaturalización d'una midida de protección y un puntu de conflictu innecesariu cuando nun existe un proyectu" y ello ye que'l Gobiernu asturianu nun tien definíes les característiques de l'autopista, qu'en dellos tramos defínese como una "vía d'alta capacidá".

La Plataforma pa la Defensa de la Cordelera Cantábrica, WWF-Adena, Greenpeace, Amigos de la Tierra, Ecoloxistes n'Acción, Sociedá Española d'Ornitoloxía-SEO, la Sociedá Española pa la Conservación y Estudiu de los Mamíferos y la Fundación Osu Pardu tan ente los firmantes del manifiestu.