Manifestación al favor de la escuela pública

Anque'l Congresu yá aprobó la Llei Orgánica d'Enseñanza, delles organizaciones asturianes siguen movilizándose contra una llei que-yos abulta una puerta abierta a la privatización del sistema educativu y contra la que ven preciso movilizase enantes de que se faigan los desarrollos autonómicos de los sos mandaos. Dientro d'esta campaña de movilizaciones ta convocada una manifestación pa esti miércoles 22 de febreru a les 7 de la tarde na plaza l'Umedal de Xixón. Ente les organizaciones convocantes tan los sindicatos SUATEA, CGT y CSI, los partíos políticos Izquierda Xunida, Izquierda Asturiana, Bloque por Asturies y PCPE y otres organizaciones como'l Sindicatu d'Estudiantes o Aula Xoven o Sindicatu d'Estudiantes.


Les organizaciones convocantes nun tan d'alcuerdu cola Llei d'Enseñanza que llevó alantre'l PSOE, y anque la Llei yá ta aprobada y amás con mayoría más qu'absoluta en Congresu, camienten qu'hai motivu pa siguir movilizándose contra ella en cuantes qu'entovía ta por facese'l desenvolvimientu de la Llei, sobremanera a nivel autonómicu, un procesu que, al paecer d'estes organizaciones ye preciso vixilar. A les organizaciones inxertes na plataforma convocante abúlta-yos que la LOE nun ye la llei que prometía'l PSOE nel so programa electoral y qu'abre munches puertes o esfalta'l camín a la privatización del sistema públicu d'enseñanza.