Maceda va entrenar al Sporting

El saguntín Antonio Maceda, antiguu xugador del Sporting de Xixón na so meyor época, ta acabante de firmar como entrenador del Sporting d'equí a qu'acabe esta temporada, anque'l contratu definitivu, que podría venceyalu otru añu más al club asturianu, ta entovía ensin firmar. Maceda quixo que la so llegada a Mareo viniere acompangada de refuerzos pal equipu nel mes d'avientu, condición cola que'l club nun quería tragar. Eso y el fallecimientu del pa de Maceda retrasaron l'alcuerdu, que, por de pronto, permitirá que l'equipu tenga quien lu mande esti fin de selmana n'Albacete. Anque llegaron ofrecimientos de los representantes d'otros entrenadores, ente los que sonaron Clemente, Pepe Mel, D’Alessandro y Víctor Espárrago, l'alcuerdu final foi con Maceda, un home con poca esperiencia de mister y que tuvo'l duldosu honor de mandar al Sporting en 16 xornaes de la lliga 97-98, en que baxó a segunda batiendo tolos récords negativos de la historia del equipu. Con Maceda, el Sporting namás sacó que dos empates y catorce derrotes. Amás del Sporting, Maceda tien entrenao al Badajoz y al Compostela en segunda división, ensin sacar nada curioso con nengún de los dos equipos.