Músicos pola Oficialidá apuesta pol soul y el funky pal cantar d’esti añu

‘Nun somos llinguateros’, cantar de Músicos pola Oficialidá que va servir de banda sonora a la promoción de la manifestación del Día de les Lletres, yá ta disponible na rede pa descargase de baldre. Esti tema avérase a soníos soul y funky.
 
Carlos Pulgar, voceru de la Xunta pola Defensa de la Llingua Asturiana, y Xune Elipe, miembru de Músicos pola Oficialidá y cantante de Dixebra, encargáronse de presentar esta mañana en Conceyu Abiertu esti cantar nel que collaboren los dos coleutivos. Pulgar principió la so intervención recordando la relaición ente dambos dende l’añu 2005, cuando s’asoleyó’l single ‘Fala’. Depués siguieron-y ‘Un pasu alantre’ y ‘Arguyosu’, tamién en formatu físicu individual, y dende’l 2008, dellos recopilatorios nes que s’incluyeron los temes ‘Garra la pallabra’, ‘Ye lo que nos pasa’ y ‘Asturlletric’. Esta sétima canción de Músicos pola oficialidá, ‘Nun somos llinguateros’, “ye especial porque usamos un formatu diferente. Pasamos d’un soporte físicu a dexar el cantar colgáu na web de la Xunta pola Defensa de la Llingua Asturiana al traviés d’un archivu mp3”, destacó Pulgar.
 
Pela so parte, Xune Elipe esplicó nun primer momentu’l funcionamientu de Músicos pola Oficialidá. “Somos un coleutivu que trabayamos de manera esporádica y coyuntural. Con esto quiero dicir que nun tenemos un trabayu continuáu a lo llargo del añu por una razón mui cenciella: creo que los músicos que componemos y trabayamos cola llingua asturiana, esi llabor de reivindicar la igualdá derechos de los asturfalantes facémoslo nel día a día nel nuestru trabayu, nos conciertos y allá onde vamos”, comentó’l cantante de Dixebra. De siguió, relató los primeros pasos del coleutivu nel estudiu de Sergio Rodríguez – persona qu’al igual qu’Elipe, mantiénse en Músicos pola Oficialidá dende’l principio– en Corvera cola idega de “componer un tema específicu que valiere de banda sonora a la reivindicación de la oficialidá de la llingua asturiana nel mes d’abril cola intención de que sonara pa estes feches nes que celebramos la Selmana de les Lletres Asturianes y el Día de les Lletres Asturianes”.
 
Elipe, que tamién destacó’l papel importante que desempeñen los músicos nel procesu de reivindicación del idioma, señaló que la base de ‘Nun somos llinguateros’ foi obra del productor musical Sergio Rodríguez. “Ésta ye distinta, mui soul y con un toque funky y un rapeáu pel mediu que da un compendiu d’estilos mui urbanos, mui contemporáneos”, describió’l cantante. Sobre ella, desarrollóse la lletra a comuña ente los cantantes que participen nel cantar d’esti añu de Músicos pola Oficialidá: Miguel Fernandi ‘Burilo’ (Skama la Rede), Delfín Valdés (La Tarrancha), Vito Álvarez (cantante de grupos como Chalaneru Sound System) y el raperu de Corvera Galán, amás del propio Elipe.
 
Respeuto a la lletra, señaló que “xugamos un poco col tresfondu que tien la pallabra llinguateru o llinguatera n’asturianu. Vien a dicir que nun tamos de broma, que nun somos refugaya nin xente ensin chapeta, que lo nueso va más allá de ser llinguateros; que la llingua asturiana merez tener los mesmos derechos que les demás”. “Creemos que quedó un cantar distintu, que ye novedosu y que suena bien al oyíu”, afirmó Elipe, qu’animó a la participación na manifestación baxo’l lema ‘L’asturianu, llingua oficial’ que va salir a les 19.30 hores del 6 de mayu de la Estación del Norte d’Uviéu coincidiendo col XXXII Día de les Lletres Asturianes.
 
Otra manera, tres finalizar les intervenciones, entrugóse a Pulgar sobre la visibilidá de los llibros n’asturianu coincidiendo cola celebración del Día del Llibru. El voceru de la Xunta pola Defensa de la Llingua Asturiana señaló que la situación de los llibros y les llibreríes anguaño “ye complicada por cuestiones de la crisis” y dixo echar un falta un esfuerzu mayor dende les alministraciones “en reforzar aquellos establecimientos que dan más visibilidá a la lliteratura n’asturianu”. Na so opinión, l’alministración debería buscar “los calces necesarios pa qu’esta lliteratura qu’ella mesma patrocina llegue a los llectores”.