Música jazz y tradicional asturiana nel discu "Jazzturianu"

La música asturiana puede garrar munches formes, namás
qu'hai qu'atrevese a rabilar con ella. Esto foi lo que ficieron Rossaleda Jazz
Quartet, grupu asturianu que versionea cantares tradicionales asturianos pa
cuartetu de jazz. D'esti rabilar colos instrumentos, la voz y los sentimientos,
cola música a la fin, sal el so primer discu entituláu en
jazzturianu.



El títulu del discu amuesa perfectamente que ye lo que quier
contanos los cortes d'esti cd, la xuntanza d'un estilu musical mui concreto, el
jazz, col asturianu como llingua y espresión musical. Nun ye
difícil decatase de que facer esta xuntanza nun ye una xera
fácil, anque nun son los primeros n'intentalo como demostraron nel so
discu Liliana Castañón Quartetu, o más de recién,
la cantante Mapi Quintana nos
directos xunta la so banda, asina, Rossaleda Jazz Quartet vien a xuntase a esti
camín. El grupu tien poco tiempu, nació en 2004, anque los músicos llevan trabayando xuntos dende 1997 en proyectos como "Una historia de amor" en 2004, y nel 2005 con "Las Damas del Jazz", amás, los más de la so actividá musical desarrollóse nos últimos años nel circuitu habitual de clubes de jazz n'Uviéu y Xixón como son el Jazz Café, el Café Galileo, el Café Bar Limbo o El Barucu. Agora, yá de cara al 2006, presenten esti discu nel que faen versiones de cantares como Campanines
de mi Aldea, A onde vas a dar agua, Chalaneru, o El mio Xuan, interpretaes por
un cuartetu de jazz de pianu, voz, contrabaxu y percusión. El discu
espublízalu Luna Music
Estudios, y grabóse nos estudios que la casa de discos tien en
Llanera.