La música folk y tradicional foi’l segundu xéneru predominante nos conciertos del 2013

L’Anuario SGAE 2014, con datos correspondientes al 2013, amuesa’l pesu importante que tien n'Asturies la música tradicional. Tres el pop-rock, estilu mayoritariu en tol Estáu, el folk ye’l xéneru más programáu de música popular, con un 10,1 por cientu de cuota cuando la media estatal ye del 1,6 por cientu. Precisamente, un grupu folk, Beleño va recibir esti vienres el Premiu AMAS honoríficu xunto cola Sociedad Fonográfica Asturiana.

Juan Carlos Fernández Fasero, direutor de la Sociedad General de Autores (SGAE) n’Asturies, Galicia y Cantabria, acudió ayeri a Uviéu a la charra ‘La música en Asturias’, la primera de les programaes con motivu del décimu aniversariu de los Premios Anuario de la Música Asturiana (AMAS), que van entregase’l vienres nel Filarmónica. Nella’l representante de la SGAE, que tuvo acompañáu por David Serna (moderador), Pablo Moro, Chus Neira, Arantxa Nieto, Andrés López y David Orihuela, destacó “el valor de la música asturiana nes sos manifestaciones diverses y la importancia de los Premios AMAS como calce vertebrador y divulgador d’esi talentu”, y trató dellos datos sobre l’estáu de la música n’Asturies reflexaos nel Anuario SGAE 2014, como la baxada del sector dende’l 2008 nun 24,5 por cientu. En términos de recaudación, los ingresos baxaron a la metá nesi tiempu. “Asturies ye tierra de música y confiamos en que les circunstancies llogren reflexar pronto, de nueu, esti fechu en cifres”, continuó.

Los datos de dichu anuariu dexen tamién constancia de la importacia que tien n’Asturies la música folk y tradicional, consolidándose’l país como’l terroriu con mayor porcentaxe de programación de conciertos d’esti estilu de música con un 10,1 de cuota, mui superior al segundu na clasificación, La Rioja, con un 6,2 por cientu. Cantabria, que solía liderar esta tabla baxa a un 0,5 por cientu nel 2013, mentes que Galicia suma un 4,2 y Euskadi, un 4,3. L’estilu mayoritariu n’Asturies ye’l pop-rock, al igual qu’en tol Estáu, con un 67,9 por cientu (la media estatal ye del 74,6 por cientu), siendo’l jazz-blues-soul la tercer categoría en programación, con un 3,7 por cientu. Éstos xéneros yeren los segundos más habituales nos conciertos n’Asturies nel 2012 con un 8,2 por cientu de cuota, añu nel que folk llegaba al 6,2 por cientu (media estatal de 3,6 por cientu).

Reconocimientu a Beleño na gala de los AMAS

El vienres, a les 20 hores, va celebrase la gala d’entrega de los X Premios AMAS nel Teatru Filarmónica, momentu nel que l’históricu grupu Beleño va recoyer l’AMAS honoríficu, que comparte cola Sociedad Fonográfica Asturiana, primer sellu discográficu del país. Con motivu del décimu aniversariu del Anuariu de la Música Asturiana y d’estos gallardones, Uviéu acueye una esposición retrospectiva na plaza Trescorrales, mesmu llugar qu’acueye meses redondes sobre música estos díes. D’igual forma, tamién se programen dellos conciertos, ente los que destaquen los que se celebren nel Ca Beleño cola presencia de Xurde Fernández y collacios (xueves), Alienda (vienres) y Héctor Braga (sábadu).