Mónica Álvarez Viña gana’l III ‘Demuestra’l to amor pola llingua’

‘¡Echa la llingua a placer!’ foi’l mensaxe que convenció al xuráu del III Concursu Lliterariu ‘Demuestra’l to amor pola llingua’ de Xunta Moza. La noreñense Mónica Álvarez Viña ye l’autora de la frase ganadora d’esti añu.
 
El fallu del xuráu diose a conocer nel trescursu del conciertu de K-Nalón entamáu por Xunta Moza nel Centru Social Autoxestionáu La Madreña pa la ocasión na selmana na que se celebró’l Día Internacional de la Llingua Materna, eventu que tuvo una bona respuesta de xente. Los responsables de la estaya de mocedá de la Xunta pola Defensa de la Llingua Asturiana fixeron un discursu en defensa de la llingua materna y destacaron “l’alta participación” nel concursu y “la calidá alta” de los rellatos participantes.
 
Álvarez Viña, qu’utilizó l’alcuñu ‘Malena pa un tangu’, llevóse como premiu un llote de productos de la Xunta pola Defensa de la Llingua Asturiana (XDLA) y de Xunta Moza, amás de llibros n’asturianu.