Méndez anuncia una movilización de tolos sindicatos n'Europa

El secretariu xeneral d'UXT, Cándido Méndez, anunció qu'a mediaos d'avientu establecerá una campaña de movilizaciones simultánea de toles organizaciones sindicales nel conxuntu d'Europa.

La campaña ta promovida pola Confederación Europea Sindical (CES) contra'l paquete de midíes que pretende "imponer la Unión Europea en relación cola crisis económica".
  
Anque nun quiso dar más detalles, Méndez anunció qu'esta segunda campaña de reivindicación va concretase a mediaos d'avientu, coincidiendo col conceyu social que va tener llugar neses feches, cola confianza n’encarar "la dimensión tan grave que tomen estes polítiques regresives de la UE pal conxuntu de trabayadores y trabayadores europeos".
     
Culpes pa la Unión Europea
El secretariu xeneral d'UXT esplicó que l'horizonte social n'Europa "ta ennegreciéndose tovía más", y la Unión Europea, por mor de la guerra de divises "pretende poner en marcha una serie de midíes que tienen un caláu bien fondu que van, hasta, más allá de los planteamientos del Gobiernu d'España".
  
Asina, dixo que la intención de la UE ye "devaluar los puestos llaborales pa meyorar les esportaciones", pero alvirtió que "nun van contribuyir a la salida de la crisis, porque van beneficiar a algún país con gran potencial esportador como Alemaña, pero va perxudicar al restu, porque'l 80 por cientu de los intercambios comerciales prodúcense nel interior de la Unión".

Asina, reprochó que'l paquete de midíes de la UE "invaden les competencies del Estáu, y nun pue utilizase como argumentu les normes europees pa imponer midíes de recorte", pero llamentó que la Comisión Europea "pretende llevar a cabu esta invasión de competencies de los estaos miembros, con midíes como la reforma de les pensiones, de la negociación colectiva y liberalizar el mercáu llaboral".