Más de dos millones de persones participen na consulta soberanista de Catalunya

Un terciu de la población catalana con derechu a votu participó’l domingu na consulta soberanista entamada pol Govern de Catalunya. El 80 por cientu de los votantes escoyó la opción ‘Sí-Sí’, esto ye, la independencia del país mediterraneu, lo que supón más de 1.800.000 persones.

Según los datos últimos daos pola Generalitat –con un 96,8 de los votos escrutaos–, participaron na consulta un total de 2.236.806 personas, alredor d’un 35 por cientu de la xente que podría votar según les condiciones puestes pa ello: mayores de 16 años residentes en Catalunya y estranxeros con tarxeta de residencia con más de trés años de vixencia, asina como aquelles persones que vivan fuera del Estáu que tuvieren la so última residencia nel país mediterraneu. En total, cifrábase’l censu potencial en más de 6.000.000 ciudadanos.

De les persones que s’averaron a les urnes, un 80,7 por cientu amosó la so voluntá de que Catalunya s’independizara, esto ye 1.806.336 persones. Les entrugues plantegaes dende’l Govern yeren dos: ‘¿Quier que Catalunya sía un Estáu? y, nel casu de respuesta afirmativa, ‘¿Quier que sía un Estáu independiente?’. Un 10,09 por cientu (225.659 persones) votó pol ‘Sí-Non’, esto ye, quier un estáu catalán pero non la independencia, y un 4,54 por cientu (101.601) optó pol ‘Non’. El 0,56 por cientu (12.538) votó en blanco. El recuentu de votos nun finará hasta dientro de dos selmanes, plazu pa votar nel estranxeru y en dalgunos puntos de Catalunya.

Satisfaición ente los nacionalistes

Artur Mas, presidente de Catalunya, calificó la xornada de “ésitu total”, mentes que los partíos favoratibles a la independencia amosaron la so satisfaición poles cifres de participación na consulta. Hai que recordar qu’ésta foi suspendía pol Tribunal Constitucional la selmana pasada tres almitir un recursu de Madrid, al igual que fixo cola primer convocatoria del 9-P y qu’obligo a Mas a alterar la so propuesta inicial. Ello ye que los resultaos de la consulta soberanista son simbólicos a nivel llegal.