Más de 80 músicos van participar nel conciertu de Spanta la Xente en La Pola Ḷḷena

Esti sábadu, a les 19.30 hores nel Teatru Vital Aza de La Pola Ḷḷena, el grupu llocal Spanta la Xente va presentar el so trabayu nuevu ‘Alienda’. Más de 80 persones van participar na actuación musical más destaca d’esta fin de selmana.
 
‘Alienda’ ye’l segundu discu asoleyáu pol grupu ḷḷenizu tres ‘Fíos d’esta tierra’ –los dos cola compañía La Mula Torda–, trabayu que sigue na mesma llina que la maqueta y el primer llarga duración. Asina, la banda continúa col so mecigayu de folk y rock que tanto presta a los siguidores. Nel conciertu de mañana nel Teatru Vital Aza, con entrada llibre, Spanta la Xente va tar acompañáu por más de 80 músicos que convidaren pa esta cita especial que van grabar pa un DVD. Les bandes de gaites Llariegu y Güestia, y el Coru La Flor son dalgunos de los nomes qu’avanzaron los integrantes del grupu de la cuenca’l Caudal.
 
Otres actuaciones destacaes de la fin de selmana son la de güei del raperu Arma X xunto con Galán y Alto Asalto nel conciertu d’esta selmana del Tribeca uviedín (20 hores) y la presentación del primer discu de Los Izquierdos, ‘Que trabajen las máquinas’ (Albéniz de Xixón, 23 hores), pa lo que convidaron a Buensuceso. Pa presenciar el conciertu de la banda de rock xixonesa ye necesario imprentar una invitación na páxina web del grupu.
 
Mentes, el sábadu va tar actuando Chano Domínguez nel Centru Niemeyer (20 hores) y Víctor Manuel na Universidá Llaboral (20.30 hores). Tamién sobresal el conciertu de Bourbon xunto con Queen Bitch na Antigua Estación d’Uviéu a partir de les 21 hores.
 
Otra manera, del vienres al domingu, Uviéu va vivir la Fiesta de l’Ascensión na zona de la Llosa, onde tamién va haber delles actuaciones musicales, entes les que destaca la de l’Asturiana Mining Company, prevista pa güei.