Más de 3.000 asturianos manifestáronse en Madrid en defensa de la minería del carbón

|

Miles de persones participaron na mañana del xueves nuna manifestación en Madrid en defensa de la minería del carbón, protesta na que se dexaron notar más de 3.000 asturianos. Reclamen al Gobiernu que cumpla colos sos compromisos.
 
A primer hora d’esta madrugada, decenes d’autocares tomaron rumbo a Castilla dende Asturies pa participar na marcha convocada a nivel estata en Madrid coincidiendo cola cuarta xornada de paru nel sector de la minería del carbón pola mengua d’un 64 por cientu de les ayudes al sector, lo que supondría’l so desaniciu y la muerte llenta de les zones mineres. L’estadiu Santiago Bernabéu foi’l puntu de salida de los trabayadores procedentes de, amás d’Asturies, Aragón, Andalucía y Castilla. Col ruíu de petardos y glayíos en defensa de la minería y contra’l Gobiernu estatal y el plan de rescate a Bankia, caleyaron peles cai de la capital castellana hasta la sede del Ministeriu d’Industria, onde la Policía llegó a cargar contra los manifestantes. L’actuación policial desendolcó en dos deteníos y multitú de feríos.
 
Nel discursu final, los sindicatos anunciaron que’l ministeriu convocó la Mesa del Carbón pal 6 de xunu próximu, onde CC OO y UXT van esixir al Gobiernu  estatal "una solución". "Si nun la hai, la fuelga siguirá indefinía", señaló’l secretariu xeneral de sector mineru FIA-UXT, Víctor Fernández. Representantes de los partíos parllamentarios PSOE, IX y Foro, ente ellos Francisco Álvarez-Cascos, participaron na protesta y reclamaron al Executivu de Rajoy qu’apoye la minería del carbón y a les zones mineres.

Contador Estadistiques