Más de 200 empreses interesaes n’ampliar mercaos participen nel foru de negocios qu'entama Asturex

La Sociedá de Promoción Esterior del Principáu d’Asturies (Asturex) entama’l martes y el miércoles n’Uviéu’l XVII Puntu d’Alcuentru Internacional. Más de 200 empreses del país cola intención d'ampliar mercaos participen nesti foru de negocios.

Los organizadores esperen que, a lo llargo d’estes dos xornaes, tengan llugar alredor de 800 conceyos ente los 30 collaboradores d’Asturex y estes 200 firmes del país “qu’apuesten pola internacionalización como estratexa fundamental pa diversificar mercaos y productos y ganar competitividá”, espliquen dende l’organismu dependiente de la Conseyería d’Economía y Emplegu. En total, son 53 los estaos que cubren esta rede de collaboradores, responsables de facer una primer valoración sobre les posibilidaes del productu o serviciu de cada empresa y el mou d’abordar el mercáu nuevu: Alemania, Benelux, Francia, Italia, Países Nórdicos (Dinamarca, Finlandia, Noruega y Suecia), Portugal, Reinu Xuníu, Éire, Eslovenia, Croacia, Bosnia-Herzegovina, Serbia, Macedonia, Montenegru, Polonia, República Checa, República Eslovaca, Rumanía, Rusia,Ucrania y Turquía, n’Europa; Angola, Arxelia, Israel, Marruecos, Qatar, Emiratos Árabes Xuníos, Túnez y Libia, n’África y Oriente Medio; Canadá, Estaos Xuníos, México, República Dominicana, Colombia, Perú, Brasil, Arxentina, Chile, Uruguai y los países centroamericanos, n’América; y China y India, nel Oriente Llonxanu.

D’igual forma, personal d’Asturex va ufrir información sobre los servicios que presta pal apoyu a la internacionalización. Éstos son el Programa d’Iniciación a la Esportación, dirixíu a empreses que deseen principiar a esportar; el Programa Asturies Coopera, pa la creación de consorcios d’esportación; y el Programa de Proyeutos Individuales, dirixíos a firmes esportadores que quieren consolidar el so plan d’internacionalización. Nesta cita que tien llugar nel Hotel Ayre tamién va presentase’l Programa de Internacionalización 2013-2015, que recueye delles aiciones “col oxetivu de qu’Asturies crezca nel volume d’esportaciones, medre’l númberu d’empreses esportadores y se consoliden y diversifiquen mercaos y sectores estratéxicos”, amás de la constitución de consorcios d’esportación. D’igual forma, van desendolcase, per primer vegada, proyeutos d’internacionalización individuales a midida pa les empreses del país.

Esta edición del Puntu d’Alcuentru Internacional, al que ye necesario inscribise pa participar, tamién va contar con puntos informativos del IDEPA, les cámares de comerciu, l’ICEX, l’Autoridad Portuaria de Xixón y l’Autoridá Portuaria d’Avilés, ente otros organismos.