Más de 200 centros educativos participaron esti cursu na Axenda Didáctico-Escolar

L’Axenda Didáctico-Escolar qu’entama la Conseyería de Cultura p’averar la creación cultural n’asturianu a la población escolar va concluyir la selmana qu’entra. 201 centros escolares de Primaria y Secundaria participaron nesta iniciativa.
 
Actuaciones lliteraries, musicales, teatrales, cuentacuentos, monólogos y inclusive una ópera bufa, foron les actividades que pudieron presenciar los escolinos y escolines asturianes –tanto de centros públicos como concertaos– esti cursu. Asina, por exemplu, na estaya lliteraria, los críos difrutaron d’once actividaes dirixíes polos escritores Chechu García, Iris Díaz Trancho, Marisa López Diz y Mar Martín, de la mano de la Editorial Pintar-Pintar, qu’analizaron l’actualidá poética, el cómic y la lliteratura infantil y xuvenil.
 
El mesmun númberu d’actividaes celebráronse tamién alredor del mundu de la música gracies a la participación de nomes destacaos de la escena asturiana, como Anabel Santiago, Xuacu Amieva, Mestura, Xentiquina, Esteban González, Dani García, Diego Pangua, Xosé Antón Fernández ‘Ambás’, Lisardo Prieto, Florentina Cuadriello, les Pandereteres de Fitoria, Mezá, Toli Morilla y Xune Elipe. Mentes, les artes escéniques tuvieron presentes nun total de nueve actividaes col Teatru Muxotatu (Adolfo Camilo Díaz y María López Barrio), Milio’l del Nido con Escenapache, Asturmitomanía, Higiénico Papel, Quiquilimón, Factoría Norte, Teatro Kumen y Yheppa.
 
Les novedaes d’esti cursu foron la presencia del monólogu y los cuentacuentos de la mano de profesionales como Carlos Alba ‘Cellero’, Olga Cuervo y Acostubaxo Teatru; y la incorporación de la representación de la ópera bufa ‘Bastien und Bastienne (Bastián y Bastiana)’, de Mozart, dirixida por Producciones Nun Tris. El númberu total d’actividaes foi de 156, que se desarrollaron en 152 centros de Primaria y en 49 de Secundaria.
 
L’oxetivu de l’Axenda Didáctico-Escolar ye apoyar el llabor docente del profesoráu de Llingua Asturiana y amosar a los alumnos y alumnes que l’asturianu “va más allá d’una materia; que ye una llave que-yos permitirá disfrutar y valorar la rica creación musical, lliteraria o teatral que s’espresa en llingua asturiana”, señalen dende la Conseyería de Cultura y Turismu, qu’entama esta iniciativa al traviés de la Direición Xeneral de Política Llingüísitica en collaboración cola Conseyería d’Educación y Ciencia. El presupuestu pa esti programa d’actividaes foi de 110.000 euros.