Más de 120 persones apuntáronse a los cursos d'asturianu d'Iniciativa

La inauguración oficial celébrase en Xixón.

Va ser esta tarde, a les 19 hores, nel Conseyu de la Mocedá de Xixón, sede onde Iniciativa pol Asturianu entama los sos cursos en Xixón. Xunto al d'esta ciudá, tamién va haber clases d'asturianu n'Uviéu, Sotrondio y Ribeseya, y de gallego-asturiano n'Ibias, amás de la xente qu'opta por facer el cursu a distancia, sumando más de 120 alumnos en total. Ente los qu'escueyen la ferramienta Moodle pa poder deprender asturianu dende'l so llar hai xente d'Italia, Estaos Xuníos, México, Inglaterra, Euskadi, Catalunya, Madrid, Illles Balears o La Rioja, la mayor parte asturianos emigraos o fíos d'emigrantes, anque tamién hai persones ayenes al país que quieren averase al nuesu idioma.

Na inauguración van participar, xunto a los alumnos, Fonsu Martín, profesor en Xixón, y Inaciu Galán, presidente d’Iniciativa pol Asturianu y coordinador de los cursos. A lo llargo de la selmana van celebrase otros actos n’Uviéu y Sotrondio, colos alumnos de los respectivos conceyos.

"Iniciativa pol Asturianu valora mui positivamente esta esperiencia que tuvo una perbona acoyida, con más 120 matriculaos nesta primer esperiencia convocando cursos nun ambiciosu plan formativu a lo llargo de toa Asturies. Yera la primer vegada qu’Iniciativa pol Asturianu convocaba cursos d’asturianu en más de 14 conceyos al mesmu tiempu y el resultáu foi mui positivu, triplicando la matriculación a les anteriores convocatories, cuando namás se ficieron cursos en Xixón", apunten dende la organización.