Más de 10.000 xixoneses lleen Asturies.com

La Encuesta Sociollingüística del Conceyu de Xixón ellaborada pol equipu del Euskobarómetro que dirixe'l sociólogu de la Universidá del País Vascu Francisco Llera Ramo incluyía como novedá dientro de la batería d'entrugues sobre l'asturianu nos medios de comunicación una entruga sobre la llectura de la ufierta de medios dixitales n'asturianu. Asturies.com apaez nes rempuestes como'l mediu n'asturianu más conocíu y emplegáu polos ciudadanos de Xixón, declarando'l 6,2% del total de los encuestaos conocer el diariu dixital, mientres que'l 3,7% afirmaron ser llectores d'Asturies.com. Estos tantos por cientu han tenese en cuenta nun contestu en que namás ún de cada trés ciudadanos aprosimadamente dispón d'accesu a la rede.

Proyectando estos datos de porcentaxes sobre la población total de Xixón, qu'acordies col censu del INE del 1 de xineru del 2004 yera de 271.039 habitantes, resulta d'ello que cerca de 17.000 xixoneses tienen en mente Asturies.com como ún referente de la información n'asturianu na rede, mientres que son aprosimadamente cerca de 10.000 ciudadanos de Xixón los qu'acceden davezu a los conteníos d'esti diariu dixital n'asturianu, un datu qu'asitia a Asturies.com como un referente informativu na ciudá. De poder estrapolase a toa Asturies los datos de la encuesta de Llera Ramo, el númberu de llectores d'Asturies.com allegaríase a la contornada de los 40.000, a los qu'habría d'amestase'l públicu de fuera d'Asturies que llee esti diariu, principal referente informativu en llingua asturiana, gracies a la universalidá de la rede internet.