L’Uviéu mete los dos pies en 2ªB.

Rivas volvió a sorprender a la hora de decidir l'equipu, tanto polos homes escoyíos como pol sistema de xuegu. Foi un apueste d'altu riesgu pela parte del entrenador manchegu, y más si pensamos que dexó a Cervero na grada, pero hai de reconoce-y l'aciertu y el riesgu asumíu. Plantegamientu perfectu de Rivas que foi clave nesta clara victoria azul que tanto lu avera a 2ª B.

L'equipu azul, que como siempre tuvo'l sofitu de la so afición, foi mui superior dende l'entamu del partíu. Los homes de Rivas salieron al campu conscientes de lo que se xugaben y nunca nun especularon col resultáu, buscando siempre'l camín más directu al gol. La presencia de Michu nel equipu y l'esquema 4-3-3 xeneraba abondes ocasiones de gol que los xugadores azules nun yeren a materializar. Esta superioridá solo tuvo espeyu nel marcador quiciabes na xugada menos clara, foi nel minutu 15 cuando Michu ponía per delantre nel marcador al so equipu con una falta qu'entró pegando primero na barrera abulense. Poco-yos duró l'allegría a los aficionaos azules, ya que 6 minutos dempués Ríos entraba nel área y Caco Morán facía-y un penalti que'l mesmu Ríos s'encargaba de marcar.

D'equí al final siguió la superioridá azul con gran colocación nel campu, munchu trabayu, presión, y monólogu atacante azul, pero calteniéndose'l 1-1 col que de forma inxusta se llegaba al descansu. Lo meyor taba por venir.

Dempués d'unos minutos de duldes nel aniciu la 2ª parte, l'equipu carbayón tomo otra vuelta'l mandu'l partíu y entamó a xenerar ocasiones. Juanchi fizo la xugada decisiva del partíu cuando nuna rápida contra llegó hasta l'área y al ver que nun tenía opción personal pa marcar, cedió-y el pelotu a Jon Carrera que tres d'un gran control orientáu sacó un tiru rasu, axustáu al palu énte'l que nada pudo facer Félix, yera'l 1-2 y la eliminatoria entamaba a decidise. L'Ávila abrió llinies y Ríos tuvo la ocasión pal empate pero ellí taba Ponzo que fizo una gran parada p'acabar cola resitencia abulense.


L'Uviéu buscó'l gol con gran decisión en tolos ataques, asina nuna gran falta de Luismi llegaba'l 1-3 que llevó'l deliriu a la grada y al propiu Luismi que na celebración mancábase nuna mano y tenía qu'abandonar el campu unos minutos. L'Ávila fundió dafechu y les ocasiones y goles azules foron cayendo darréu, nel minutu 43 Yeray fizo'l cuartu de falta y yá nel tiempu amestáu Aldeondo-y ponía la rúbrica col jorobu a un gran partíu.


Queda un partíu de vuelta nel Tartiere que tien que ser de fiesta y celebración pa una afición que lo merez dafechamente. Paez claro qu'ayeri superóse'l primer escañu d'un llargu y duru camín de retornu que tien más problemes que los deportivos, pero esi ye otru tema qu'habrá de solucionar rápido, de momentu l'afición azul disfruta un poco agora que pue y que lo merez.