L'Uviéu cesa a Del Pozo como direutor deportivu

Carmelo del Pozo dexó esti martes de formar parte de la disciplina del club azul.

Paecía que la so salida taba cantada a final de temporada, depués de la dimisión de Sergio Egea y del enfrentamientu que caltenía con una bona parte de l'afición tres esti fechu, pero los malos resultaos últimos del equipu entrenáu por David Generelo adelantaron los acontecimientos. Esta mañana, según informen medios de comunicación especializaos a falta del comunicáu oficial del Uviéu, el segovianu acudió a les oficines del club, onde se-y comunicó una decisión que vien tomada dende México.

D'esta forma, el conxuntu azul queda ensin direutor deportivu nuna época na que'l club debería tar trabayando na planificación de la próxima temporada, yá sía en Segunda o en Primera nel casu d'algamar l'oxetivu marcáu pol Grupo Carso. Nun paez que de momentu vaya cubrise'l cargu qu'ocupaba Del Pozo de manera oficial dende'l 2014, anque enantes yá participara na ellaboración de la plantiya de la temporada anterior, dirixida por José Carlos Granero, col que llegó a Uviéu como preparador físicu, anque ye posible que'l mexicanu Joaquín del Olmo s'encargue d'esti área de manera momentánea.