L'Uviéu busca un cambiu de rumbu con Egea al mandu de la nave

|

El téunicu arxentín torna a El Requexón tres el cese d'Anquela na tarde del llunes.

Saltaba la sorpresa ayeri cola anuncia del Uviéu al traviés de la so web de que l'andaluz nun siguiría nel bancu azul por "alcuerdu mutuu", dalgo que desmentiría esta mañana'l propiu Juan Antonio Anquela nuna despidida cargada d'amueses de ciñu hacia l'afición y la ciudá. La decisión de cambiar d'entrenador venía polo tanto del propiu club, buscando un revulsivu pa enganchase a les posiciones d'eliminatories d'ascensu, agora a 5 puntos tres empatar 3-3 el domingu en casa col colista, el Córdoba.

Cuando la mayoría pensaba nel téunicu del filial, Javier Fernández-Rozada, como'l más que posible sustitutu, llegaba la segunda sorpresa pocu tiempu depués. L'escoyíu pa finar la temporada yera Sergio Egea, entrenador qu'algamara l'ascensu a Segunda na temporada 2014-2015, dimitiendo al añu siguiente, nel mes de marzu, col equipu colocáu na tercera posición, por motivos personales, anque detrás taben discrepancies con un sector del vestuariu con gran pesu nel mesmu.

La salida del arxentín foi un enantes y depués nesa campaña, yá que con David Generelo al frente l'Uviéu finó na novena plaza con 59 puntos, a 5 d'Osasuna, sestu clasificáu que finalmente xubiría nes eliminatories d'ascensu. El tiempu, poro, daba la razón a Egea, qu'agora torna a falta de siete xornaes pal final col oxetivu de superar a 3 rivales pa clasificar pa los play-offs.

 

Contador Estadistiques