L'Uviéu alienda a costa d'un floxu Sporting

|

Borja Sánchez desnivela'l derbi gracies a una acabalgada espectacular con apoyu n'Ortuño.

L'Uviéu sal reforzáu d'El Molinón con una importante victoria que-y permite salir de los puestos de descensu y afrontar con más tranquilidá'l choque del xueves col Fuenlabrada (21.45 hores, Carlos Tartiere). Ziganda plantegó meyor el partíu qu'un Sporting qu'ufrió la so cara mala, indigna pa un derbi, con múltiples errores nel pase y dos llaterales ensin peligru ofensivu.

Nacho Méndez, Salvador y Manu García, que completaron los 90 minutos, nun supieron dar sentíu al xuegu del Sporting en nengún momentu. L'Uviéu, bien posicionáu y tranquilu nel so xuegu, esperaba la so oportunidá que llegó cola entrada de Borja Sánchez, qu'a los diez minutos de tar nel campu robó un balón en defensa a Unai Medina, comenzó una acabalgada que Salvador nun supo frenar, ganó en velocidá a Méndez y superó a Mariño cola puntera énte la impotencia de Babin.

Djukic tornó a nun agotar los cambios a pesar de la situación y el Sporting nun reaicionó nos 20 minutos restantes de partíu. Namái una xugada aislada, que finó en gol de Babin, en fuera de xuegu por milímetros, inquietó al Uviéu nel tramu final.

El conxuntu azul alienda con esta victoria, mentes que los roxiblancos, que viaxen el xueves a Madrid pa enfrentase al Rayo (19.30 hores, Vallecas), dan un pasu atrás nunes aspiraciones d'ascensu vía play-off que paecen más una quimera qu'una realidá dada la imaxe del equipu ayeri n'El Molinón.

 

Contador Estadistiques