L'Uviéu va disputar l'ascensu col Cádiz y el Condal, col Rayo Majadahonda

El Cádiz ye'l rival qu'ha de superar l'Uviéu pa cumplir l'oxetivu de la temporada de tornar a la Segunda División. En Tercera, el Condal va disputar l'ascensu col Rayo Majadahonda.

El sortéu celebráu ayeri en Las Rozas empareyó al Uviéu col consideráu equipu más potente de los posibles rivales que-yos podía tocar, el Cádiz. La ida va xugase'l domingu nel Carlos Tartiere Nuevu, a les 17 hores, con entraes pa socios a 10 euros, que van poder mercar otra pa un acompañante por 15 euros –hasta'l xueves–. Mentes, el públicu ha de pagar 30 euros. Otra manera, Huesca y Nàstic completen los duelos pol ascensu a Segunda pela vía rápida.

L'otru equipu asturianu que pue xubir a una eliminatoria única, el Condal, va tener enfrente otru rival mui duru como ye'l Rajo Majadahonda, campeón madrilanu. Los de Noreña, que completaron una temporada impresionante, superando al gran favoritu, Caudal, van xugar tamién primero en casa, el domingu al meudía. Mentes, los de Mieres van tener que superar trés rondes pa recuperar la Segunda División B, siendo l'Haro'l so primer contrincante, un equipu al que Pablo Lago yá eliminó l'añu pasáu col UP Langreo. Al quedar segundu, la ida va xugase en La Rioja'l domingu a les 18 hores.

El Vetusta, filial del Uviéu, va tener enfrente otru clásicu del fútbol estatal, como ye l'Arenas de Getxo, que va visitar El Requexón el domingu al meudía, mentes que'l CD Tuilla va xugar de sábadu (18.30 hores) n'El Candín col Pobla de Mafumet, segundu clasificáu del grupu catalán. Dende'l 2003, esti club furrula como filial del Nàstic, anque calteniendo la so estructura propia.

Otra manera, l'Avilés va xugar pola permanencia en Segunda División B nuna eliminatoria única col Eldense, club que planificó pa esta temporada tres algamar l'ascensu na pasada Omar Zeidán, el representante supuestu d'un grupu d'inversión con sede en Londres que quixo mercar el Sporting a últimos del 2014. Los de John Clarkson van recibir a los alicantinos el sábadu, a les 19.30 hores, nel Suárez Puerta.