L'usu del asturianu na Xunta Xeneral pasa pola reforma del reglamentu

La falta d'oficialidá impide la comunicación n'asturianu por parte de l'Alministración.

L'informe del Lletráu Mayor de la Xunta Xeneral nun trai nada que nun se sepa. L'asturianu pue usase na Xunta Xeneral, pero la normativa impide que l'Alministración pueda comunicase na llingua del país. La falta de la oficialidá y que'l reglamentu de la Cámara nun ye lo suficientemente precisu nel asuntu de la llingua asturiana fai que'l so usu nun sía posible.

La solución pasaría pola declaración de la oficialidá o por una modificación del reglamentu. Lo primero ye dalgo que la FSA-PSOE nin se plantega, mentes que los socialistes abren les puertes a lo segundu siempre que'l cambiu nun sía esclusivamente pa la cuestión llingüística, según confirmó ayeri Fernando Lastra. Izquierda Xunida considera, mentes, qu'hai víes llegales pa usar l'asturianu ensin necesidá de camudar la normativa, como podría ser una resolución del presidente de la Xunta Xeneral.