L'usu de la toponimia oficial por Correos, escoyida 'Meyor noticia pal asturianu 2022'

|
Correos moto llétrica

Iniciativa pol Asturianu vien entamando dende'l 2013 una votación en llinia coles meyores nueves rexistraes nel añu pal idioma.

'Correos anuncia que va entamar a respetar la toponimia oficial' entitulaba'l 10 de payares Asturies.com. Esti pasu dau pola empresa pública, depués d'años de reivindicación por parte d'usuarios, foi la más votada de les 33 propuestes del coleutivu pa ser declarada 'Meyor noticia pal asturianu 2022', ente les que taba'l 25 aniversariu d'esti mediu de comunicación dixital.

"La ciudadanía valora'l compromisu de la compañía prestataria del serviciu postal universal, que comunicó en payares que yá entamara col procesu d’actualización de les sos bases de datos depués de numberoses reclamaciones. La nueva llega cuasique dos décades depués de l'aprobación de los primeros decretos. El procesu podría tar completáu nel primer trimestre del 2023", espliquen dende Iniciativa pol Asturianu.

La segunda noticia que más votos algamó foi l'anunciu de la incorporación gradual del asturianu nos servicios informativos de RTPA y la so reconocencia como méritu en concursos y oposiciones llaborales, mentes que la tercer posición llevóla la de la creación de Falamos, el proyeutu pilotu de formación non reglada d'asturianu y gallego-asturiano p'adultos.

Semeya propiedá de Correos.

 

Contador Estadistiques