L'UP Langreo-Vetusta, n'asturianu en TPA

El partíu va disputase'l domingu al meudía.

TPA recupera esta campaña les retresmisiones n'asturianu col duelu ente l'UP Langreo y el Vetusta, dos de los trés equipos del país del grupu 2 de la Segunda División B. Miguel Fernandi va encargase de la narración del choque, colos comentarios d'apoyu de Nacio González.

El filial del Uviéu llega esti partíu nun escelente momentu de forma a pesar de perder el domingu n'El Requexón col Barakaldo (0-1), ún de los equipos de la zona de privilexu esta temporada, derrota que vieno de penalti nel añadíu. Los de Rozada ocupen la cuarta posición, que da derechu a xugar pol ascensu, con 35 puntos, cinco menos que los vascos y ún más que la UD Logroñés, y pierden pa esti partíu a Edu Cortina y Ugarte por sanción.

El que ye casi seguro que tampoco nun va tar ye'l delanteru del Unión Sergio Ríos. El futbolista, cedíu pol Avilés en Ganzábal, ye pretendíu pol Eibar pa xugar nel CD Vitoria, equipu qu'actúa como filial del conxuntu armeru, y podría salir hacia Gasteiz nun trespasu qu'aportaría al rodiu de 150.000 euros al club avilesín y que nun sienta nada bien en Llangréu.

Esta salida obligaría a fichar un atacante pa completar la plantiya dirixida por Hernán Pérez. El téunicu, que ta protagonizando una escelente campaña nel retornu del Unión a la categoría, con una cómoda octava posición con 29 puntos, los mesmos que'l Sporting B, sí va disponer pa lo que queda de temporada de Jorge, defensa central procedente del Rayo Majadahonda con pasáu en Primera col primer equipu roxiblancu que ta acabante de rescindir colos madrilanos.