Luis Miguel Piñera axunta la historia del pop de Xixón de los 60

Güei martes 10 preséntase en Xixón el llibru-discu "pop playu" qu'axunta 25 cantares d'otros tantos grupos del Xixón de los años 60 xunta un llibru en que se fai un analís del entamu de la música pop na villa de Xovellanos, too ello estrao con bien d'anécdotes.

El Director Xeneral de Promoción Cultural y Política Llingüística, Carlos Madera y el cantante de rock granadinu Miguel Ríos van asistir a la presentación d'esti llibru - discu qu'asoleya la casa Piraña Family Records col patrociniu del Conceyu de Xixón y la Conseyería de Cultura d'Asturies. Grupos como Los Bríos, Los 2+2, Los Juniors, Cabezudo y Lastra, Los Jaguar´s, Espectros o los anicios musicales de cantantes como Xulio Ramos conséñense nesta obra biográfica fecha por Luis Miguel Piñera y qu'a lo llargo de más de 300 páxines amuesa la vida musical que tenía por escenarios qu'en munchos casos entovía sobreviven como'l Jardín, o'l Rocamar. El nacimientu d'una primer escena musical nel Xixón de va yá más de cuarenta años espéyase en tola probitú d'un tiempu en que nun yera fácil l'accesu a los instrumentos, como exemplifica l'anécdota del grupu xixonés "Los A2" que tuvieron de construyise la so propia guitarra eléctrica, amás d'otres curiosidaes como una semeya del futbolista Enrique Castro "Quini" tocando unos timbales.