Luis Argüelles y Avelino Moro yá tienen una placa n'homenaxe nel Muséu del Pueblu d’Asturies

Un grupu de ciudadanos inauguraron na mañana del martes una placa nel Muséu del Pueblu d’Asturies pa homenaxar a los sos impulsores, Luis Argüelles y Avelino Moro. Ésta ta situada nun llateral del edificiu del Muséu de la Gaita.

El Conceyu de Xixón, al traviés de la Fundación Municipal de Cultura, Educación y Universidá Popular, fixo d’intermediariu d’esta iniciativa ciudadana que pretende, con la instalación d’esta placa, que nun quede nel escaezu’l llabor tán importante que fixeron Argüelles y Moro, nunos tiempos complicaos pa la identidá asturiana, pa caltener la memoria del pueblu asturianu. Asina, Gonzalo Mieres y Armando Nosti , ex conceyal con Unidad Gijonesa, encargáronse de llevar a Xosé Nel Riesgo una idea que yá ye una realidá. Dende esta mañana, xunto a la placa que recuerda a José Blanco Alonso, gaiteru mayor de Xixón, ta la d’Argüelles y Moro, qu’incorpora un testu que principia señalando “Percorrieron Asturies pa que la nuesta cultura tradicional nun desapaciese”, pa depués afirmar que dambos “punxeron les bases” del Muséu del Pueblu d’Asturies pa que los asturianos s’alcordasen “de lo que fuimos y d’aú venimos”.

Mieres, persona mui popular en Xixón y direutor del programa 'Bravo, asturianísimo', encargóse de presentar un actu nel que tuvieron presentes familiares de los homenaxaos, collacios y miembros de la Coral Costa Verde, amás del edil popular Manuel Pecharromán. El gran ausente foi Argüelles por cuestiones de salú –Moro finó nel añu 1977–, yá que tuvo ingresáu recién nel hospital. Asina, el folclorista foi falando de la vida y trayeutoria de los impulsores del Muséu del Pueblu d’Asturies enantes de dar la pallabra a les persones que quixeron intervenir. El primeru foi Nosti, qu’apuntó que “falar asturianu agora ye dalgo normal, ta de moda, pero naquel tiempu –en referencia a cuando se punxo en marcha’l Muséu del Pueblu d’Asturies– taba mal visto; yera d’aldeanos”, y qu’agradeció a les autoridaes la so disponibilidá pa facer realidá la instalación de la placa. Al respeuto, Riesgo afirmó qu’esti xestu entamáu por un grupu de ciudadanos “yera de xusticia” y destacó la predisposición de Joaco López, direutor del Muséu del Pueblu d’Asturies. Por último, apuntó que’l papel de les alministraciones ha de ser “el d’intermediar” cuando recibe solicitúes de la ciudadanía.

Reclamación d’una cai pa caún

Nesti momentu del actu, el pintor Roberto Díaz de Orosia quixo intervenir pa recordar la figura d’Argüelles y Moro, “que tanto llucharon por esto, echando hores y hores”, y reclamó al Conceyu de Xixón “dalgo más. Una cai pa caún”. A esti pidimientu sumóse Joaquín Fuertes, que recordó les dificultaes que dambos atoparon nos primeros años, “cuando munchos señalaben que diben enllenar de mierda la Feria de Muestres” cola so iniciativa. “Esti reconocimientu a la so llabor ye una escusa pol agraviu enorme que sufrieron”, añadió.

Isabel Moro, fía d’Avelino, tuvo la intervención más llarga y emotiva, recordando dellos episodios de la vida del so padre. Asina, apuntó que’l Muséu del Pueblu d’Asturies “yera la so vida” y detalló como diba polos pueblos entrugando a los paisanos ‘¿Qué ties pel horru?’, rescatando asina xarres de sidra, pieces de cerámica o lo qu’atopara, anque tuviera vieyo, lo que llevaba llueu pa casa, pa disgustu de la so muyer, pa depués trayelo al Museú. Darréu, recordó al fotógrafu Manuel Encinas, que facía les semeyes que llueu Moro, escritor y periodista, espublizaba nel diariu ‘El Comercio’, y al restu de persones que conformaben un equipu que trabayaba enforma pola idea entamada nel 1968 xunto al ríu Piles, como Luciano Castañón, Luis Alonso, Belarmino Prada o Emilio Palacios. D’igual forma, compartió colos presentes la pena que-y dio l’escaezu nel qu’entró’l so padre por parte de les instituciones tres la so muerte hai 36 años, lo que fixo que nun pisara’l recintu museísticu nos 35 años últimos. Tornaría hai pocu tiempu, tres conocer l’homenaxe previstu, y destacó lo guapo que lu atopó. “Supúnxome una sorpresa gratísima”, afirmó.

El fíu d’Argüelles, Luis, recordó la so infancia nel Muséu del Pueblu d’Asturies –“paezme agora too más pequeño”– y, al igual qu’Isabel, apuntó que tuvo munchos años ensin pisar les instalaciones –“nos años de decadencia” –. “El cese foi mui difícil pa él, que quería que’l Muséu fora un pueblu vivu”, apuntó, pa depués criticar el “maltratu que sufrió por parte de les instituciones”.

Conciencia de pueblu

Pela so parte, el conceyal d’Educación, Cultura, Xuventú y Festexos, Carlos Rubiera, continuó’l discursu de Riesgo sobre’l papel de les instituciones –“han de representar y dar cauce a les iniciatives ciudadanes razonables”– y destacó la importancia de la creación entamada por Argüelles y Moro “porque un pueblu ha de tener conciencia de pueblu. Si non valoramos el nuesu pasáu, nun tendremos futuru como pueblu”. Por último, llamentó nun conocer en persona a Moro, pero sí amosó l’arguyu que siente “por servir a Luis Argüelles y a la so familia” cuando yera mozu y trabayaba en L’Aldea, el merenderu que los sos padres rexentaben en Cabueñes.

L’actu finó cola actuación de la Coral Costa Verde, qu’interpretó los cantares ‘Axuntábense’ y ‘Gijón del alma’. Otra manera, Mieres anunció una sesión de ‘Bravo, asturianísimo’ n’ochobre nel Teatru Xovellanos n’alcordanza de Moro “con música, canción y munchos recuerdos”.