L'UC Ceares celebra'l so 70 aniversariu con un alcuentru de fútbol popular y un festival

|
III Alcuentru Futbol Popular

Más d'un centenar de direutivos y aficionaos d'equipos xestionaos polos socios van participar nel III Alcuentru de Fútbol Popular qu'entama nesta ocasión l'UC Ceares coincidiendos colos actos del so 70 aniversariu. El Ciares Rock Fest, nel que va actuar Dixebra, completa los eventos previstos pa esta fin de selmana.

Tres celebrase en Palencia y Murcia, l'Alcuentru de Fútbol Popular aporta a Xixón de la mano del Ciares. Esta iniciativa trata de poner en común esperiencies y visiones del fútbol que busquen qu'esti deporte sía inclusivu, participativu y sostenible.

L'actividá va principiar a les 19.30 hores d'esta tarde nel Colexu Públicu Xovellanos cola inauguración y bienvenía a cargu de Xosé Estrada, secretariu del Ciares, y Ben Shave, de Supporters Direct. Darréu, Miguel Ángel Sandoval (Unionistas de Salamanca) y Diego del Valle (Tu Fe Nunca Decaiga) van protagonizar el primer alderique, entituláu 'Democratizando el fútbol, ¿cómo recuperar tu club?', que va moderar Emilio Abejón, de la Federación de Accionistas y Socios del Fútbol Español (FASFE). La xornada va siguir na medianueche con una 'Fiesta por el Fútbol Popular' en La Folixa, con música pinchada por Dj Ciareslautern y JuanchoFlagman.

Yá de sábadu, les actividaes van treslladase al albergue de Contrueces, onde a les 11 hores van presentase los proyeutos del SD Logroñes y del Orihuela Deportiva. Llueu, al meudía, va celebrase'l taller 'Hacia un fútbol inclusivo: l@s olvidad@s del fútbol', sobre fútbol adaptáu y fútbol femenín, pa depués siguir cola charra '¿Cómo gestionar las gradas y grupos de animación?', que modera Alejandro Coca, del Xerez Deportivo.

Tres una posa pa xintar, a les 16 hores Iñigo Arza, del Ciares, va moderar l'alderique 'Participación y modelos democráticos en los clubs de fútbol'. Depués l'actividá treslladaráse al patiu del Colexu Públicu Los Pericones, onde va desendolcase'l Ciares Rock Fest de magar les 20 hores.

Rock n'asturianu

Esti festival va contar cola actuación de Dixebra, que va compartir escenariu con Ana Curra, Lagartija Nick y Peralta. El preciu de la entrada ye de 12 euros anticipada y de 15, na puerta.

El domingu, mentes, va continuar el III Alcuentru de Fútbol Popular con un conceyu zarráu de tolos clubes participantes. Otra manera, les actividaes pol 70 aniversariu del Ciares van completase'l 20 d'agostu con un partíu amistosu en La Cruz ente'l Gijón Fútbol Femenino, entidá hermanada col equipu del barriu popular xixonés, col Athletic Club, campeón actual de Primera División.

Contador Estadistiques