Luar na Lubre actúa en Cangas y Skontra, en Xixón xunto con Talco

|
Luar na Lubre

Visita nueva a Asturies del grupu gallegu de folk y de la banda italiana de ska-punk.

La histórica formación Luar na Lubre, fundada nel 1986, va tocar en Cangas del Narcea. El grupu gallegu más internacional va facelo'l domingu a les 20 hores na plaza de La Oliva dientro de la programación de la XVIII Sumana Cultural dientro la xira 'Ribeira sacra', mesmu nome que'l so discu últimu, que contó cola collaboración de Víctor Manuel o Marisa Valle Roso.

En Xixón, esta nueche, el festival nuevu 'Rock-Ola', con programación enfocada a la música y al cine, entama una actuación de Skontra con Talco, con entraes a la venta por 16 euros. La banda de punk-folk va abrir el conciertu a les 21 hores, pa depués dar pasu a los italianos, cola so xira The winner isn't' que yá pasó per Uviéu l'añu pasáu, a les 22.15 hores.

Suspendíu'l conciertu d'Ún de Grao

La cita d'Un de Grao del domingu nel café-bar ḷḷuarqués Cromwell queda aplazada hasta fecha nueva por confirmar. José Martínez Álvarez, finalista del III Concursu Canción Asturiana Valle del Narcea que se va resolver el 4 de mayu, va llevar la so propuesta musical n'abril a Xixón, con actuaciones nel Audio (xueves 4, 20.30 hores), El Golfo (xueves 25, 19.30 hores) y el Drink Planet (domingu 28, 13 hores); y Uviéu, con un conciertu nel Manglar (sábadu 27, 13 hores).

Contador Estadistiques