Losone abre la segunda temporada de 'El Club Musical' na TPA

Esti martes, a les 22.50 hores, estrénase la segunda temporada de 'El Club Musical' na TPA. El programa dirixíu y presentáu por Xune Elipe va abrir esta serie de 13 programes con Losone y los temes del so álbum debú ‘Umbilical’.

 

Col asturianu como llingua vehicular, esti programa de la televisión pública del país producíu por Goxe Producciones trai novedaes con respeuto a la primer temporada, sobre manera nel campu estéticu y visual. Asina, anúnciase una realización “más atractiva y moderna”, a cargu de Javier Lueje, amás de la incorporación d’elementos d’atrezzo nel escenariu, una illuminación renovada, una sintonía nueva compuesta por Jorge Cambareli, más seiciones y un montaxe más dinámicu. Tamién se presenta un logu nuevu y esclusivu, obra del diseñador JM Navarro.

 

La dinámica va ser la mesma, con una entrevista al grupu convidáu y la interpretación de delles canciones sobre un escenariu, que nesta ocasión va ser el del Teatru El Llar de Los Campos (Corvera), “qu’ufierta unes condiciones acústiques y estétiques perafayadices” comenten dende Goxe. La esceición única ye l’episodiu protagonizáu por Fe de Ratas –va emitise’l martes próximu–, que se grabó na ilesia reconvertida en pista de skate asitiada nel Polígonu d’Asipo (Llanera). Pa dar más conteníu al programa, nesta segunda temporada incorpórase una seición na que dellos personaxes rellacionaos col mundu de la música n’Asturies –intérpretes, periodistes, llocutores, fotógrafos, realizadores, productores...– van facer una recomendación, yá sía de llibros, películes, esposiciones, discos o festivales. D’igual forma, nos capítulos finales va incluyise’l comentariu sobre un cómic que tenga ambientación musical, ente otres novedaes temátiques.

 

Los encargaos d’abrir esti segundu bloque de programes de ‘El Club Musical’ son Losone, banda que bebe de dellos estilos y que, tres dellos años de conciertos y cambios na so formación, sacó nel 2013 el so primer álbum, ‘Umbilical’ (Algamar Producciones), con un soníu propiu que ta dando muncho que falar dientro y fuera d’Asturies. Tres d’ellos, el públicu va poder conocer de primer mano, tolos martes a les 22.50 hores, a otres munches bandes del país qu’abarquen soníos que van dende’l rock sureñu, el folk, el swing o’l punk a la canción d’autor, el hip hop, l’indie o’l jazz. El llistáu completu d’esta temporada  ye’l siguiente: Losone, Fe de Ratas, Silvia Quesada, Eladio Díaz Control Z, La Tarrancha, Tyfpe, Trashtornados, Tejedor, Queen Bitch, Corquiéu, Eye in the sky y Dixebra. Amás, dedícase un programa especial al hip-hop nel que van participar Arma X, 13 Palabras y K-Nalón. Dende Goxe destaquen que’l porcentaxe de grupos qu’empleguen l’asturianu nesta etapa ye “peraltu” y apunten qu’un de los oxetivos del programa ye presenta a la llingua como “un vehículu de comunicación venceyáu a les xeneraciones más nueves y nun contestu de modernidá”.