Los XIV Alcuentros de la Mocedá cola Llingua axunten a mediu millar d'escolinos nel Pueblu d'Asturies

|
Los XIV Alcuentros de la Mocedá cola Llingua axunten a mediu millar d'escolinos nel Pueblu d'Asturies

Esti martes, nel Muséu del Pueblu d'Asturies, van celebrase los XIV Alcuentros de la Mocedá cola Llingua qu'entama la Oficina de Normalización Llingüística de Xixón dirixida al alumnáu que recibe clase d'asturianu nos Institutos d'Educación Secundaria de Xixón. Mediu millar de mozos y moces van participar en talleres, cantar o xugar n'actividaes cola llingua asturiana como idioma vehicular.

Nesta edición de los Alcuentros de la Mocedá cola Llingua hai programaes una serie de talleres y xeres como creación gráfica, doblaxe, baille, rock, narración oral, rap, fotografía, cocina y audiovisuales. L'oxetivu ye averar a los participantes al asturianu fuera del aula.

Cada grupu va realizar un taller –el que-yos correspuenda por sortéu– a cargu de profesionales de la trayeutoria de Xurde Margaride (fotografía), Ruma Barbero (creación gráfica), David Varela (baille), Delfo Valdés (rap), Paula Cristóbal (cocina) y Alberto Rodríguez (doblaxe), amás de participar en xuegos tradicionales asturianos y concursar nun karaoke col cantar que yá se-yos apurrió nos entamos del cursu escolar. Como actividá destacada ta la charra que va dar Xune Elipe, cantante de Dixebra, sobre los 30 años de vida que cumple'l grupu nesti 2017, a lo que hai que sumar los cuentos sobre lleendes urbanes que va protagonizar Dolfo Camilo Díaz y una coreografía preparada por Iniciativa pol Asturianu.

Esti añu participen 11 institutos y un colexu, polo que'l númberu de mozos y moces que van alcontrase nesta xornada va tar al rodiu del mediu millar. Ésta va comenzar a les 9.30 hores y va allargase hasta les 13.30.

Contador Estadistiques