“Los World Cheese Awards van convertir a Asturies na capital quesera del mundu”, asegura López

Uviéu va acoyer del 4 al 7 de payares el ‘Asturias Paraíso Natural International Cheese Festival’, que va contar colos World Cheese Awards como eventu central, asocediendo a la población lombarda de Bèrghem na so organización. La direutora xeneral de Desarrollu Rural y Industries Agraries, Begoña López, aseguró en FITUR que “el festival va convertir a Asturies na capital quesera del mundu”.

El Gobiernu aprovechó la celebración de la feria madrilana dedicada al turismu pa la presentación del ‘Asturias Paraíso Natural International Cheese Festival’ y de los World Cheese Awards, el certame queseru más importante del mundu. Más de 3.000 quesos y 300 xueces internacionales van tar presentes n’Uviéu cola fin de premiar a los productos más destacaos en diferentes estayes na trentena tercer edición del certame.

Ente les actividaes previstes rescampla la celebración del primer congresu científicu del quesu, la participación de restauradores de sonadía o la creación d’un espaciu de fusión de gastronomía y de comedia abiertu al públicu llamáu Gastro Cheese Comedy. Amás, van entamase esperiencies y prebes onde los Alimentos del Paraísu van ser los protagonistes, una marca que, según apuntó López, “ye’l buque insinia qu’identifica les nueses producciones singulares, que son el reflexu del saber facer de los habitantes del mediu rural asturianu”.

El certame inclúi tamién una exhibición de productos y va atrayer a Asturies a críticos y prensa gastronómica, compradores y distribuidores, que van tener la oportunidá de rellacionase de manera direuta colos productores y conocer les últimes tendencies de gastronomía y quesu. “L’eventu supondrá un impulsu a la proyeición internacional d’Asturies y de los nuesos productos agroalimentarios, y fadrá que la nuesa tierra se convierta na capital quesera del mundu cola celebración dientro d'esti festival de los World Cheese Awards”, añadió López énte los medios y los profesionales del sector turísticu presentes nel puestu d’Asturies na Feria Internacional de Turismo (FITUR) de Madrid.

Na semeya, Alfredo García Quintana, conceyal d'Hostelería, Turismu y Congresos del Conceyu d'Uviéu; López; Santiago Menéndez de Luarca, presidente d'honor del 'Asturias Paraíso Natural International Cheese Festival'; y Luisa Villegas, directora del Instituto del Queso y del 'Asturias Paraíso Natural International Cheese Festival', na presentación del certame nel puestu d'Asturies en FITUR.