Los versos xúnense a la música en Xixón la prósima selmana

Esti domingu entama POEX 2022, un alcuentru poéticu.

El prósimu domingu empiecen les actividaes de POEX que van axuntar a poetes llariegos y de proyeición internacional nos centros municipales de Xixón. A les 19:00 hores va ser la inauguración coles autoridaes nel patiu del Antiguu Institutu Xovellanos, pa dexar pasu a Javier García Rodríguez y Pancho Varona. L’escritor y profesor de la Universidá d’Uviéu, publicó’l so últimu poemariu Miedo a los perros que me han dicho que no muerden va dos años.

Esta vez, va percorrer la trayeutoria musical y rellación cola poesía de Pancho Varona. El componente del grupu de los noventa Viceversa, compuso cantares p’Ana Belén, xiró como baxista de Sabina y foi productor d’Estopa. Ana Lamela va presentar el so discu Poética d’un Carbayu a les 20:30.

Esti proyeutu pon música a poemes d’autores asturianos d’anguaño como Esperanza Medina, Ángeles Carnaval, Pedro Menéndez, Alfredo Garay, Vanessa Gutiérrez, Julia Navas y la mesma Ana Lamela. Esta cantautora, amás de filóloga y profesora de talleres d’escritura, pasó como lletrista, teclista y cantante dende los ochenta por bandes como Esta Noche Tampoco y Corazón Loco.

Baxo’l nome de Tierra, publicó Poética d’un Carbayu con una campaña de micromecenazgo na qu’esplicaba que “l’oxetivu ye difundir la poesía asturiana actual”. Los alcuentros con poetes y persones lligaes a esti xéneru, del altor d’Isabel Bono, Karmelo Iribarren o Ana Luisa Amaral, y les charres, llectures poétiques y proyeiciones van continuar hasta’l domingu 3 d’abril.