Los vecinos de La Pola Siero celebren los Güevos Pintos dende les ventanes

La bendición n'asturianu foi nesta ocasión virtual por cuenta les midíes instituyíes pol estáu d'alarma pola pandemia de COVID-19.

La Pola Siero engalanóse esti martes polos Güevos Pintos, celebración que se treslladó de la cai a les ventanes y balcones, dende onde cantaron l'himnu d'Asturies tres la bendición de los güevos pintos. La imposibilidá de salir de les sos cases nun quitó les ganes de folixa a los vecinos nun cita marcada en colloráu nel calendariu por toles poleses y polesos.

Na bendición en llingua asturiana tuvieron presentes el párrocu de San Pedro Apostol de La Pola, Juan Manuel Hevia, xunto col alcalde Ángel Antonio García González 'Cepi' y Jenaro Soto, presidente de la Sociedad de Festejos de Pola de Siero, que nesta ocasión foi telemática. "Toos vais a entender qu'esti martes de Pascua, martes de Güevos Pintos nun tien nada normal", principió'l cura, que recordó a los "hermanos" que morrieren y a los sanitarios "pol so bon facer nel bien de toos, xugándose la vida como tantos otros: los miembros de les fuercies de seguridá, Proteición Civil, dependientes, reponedores en tiendes y supermercaos, tresportistes, llabradores, pescadores, personal de llimpieza, trabayadores de residencies de mayores, albergues y centros d'acoyida... Una llarga llista interminable onde hai creyentes y non creyentes".

Orixe de la fiesta

Nun se sabe seguro por qué esta fiesta, tan rara de ver en tola Península, se celebra en Siero y tamién en Llangréu, pero ye bien fácil que'l so aniciu tenga que ver cola revolución industrial. Ello ye qu'a Siero y Llangréu, los dos conceyos en qu'entamó la minería moderno del carbón n'Asturies, llegaron nel sieglu XIX a trabayar na mina cantidá d'inxenieros y personal especializao d'otros llugares onde sí se fai la tradición de los güevos, asina que lo más seguro ye que la fiesta viniere con ellos.

Semeya propiedá del Conceyu de Siero.