Los usuarios d’Asturies.com creen que la oposición ha de presentar una moción de censura contra Rajoy

El silenciu del presidente del Gobiernu estatal pol ‘casu Bárcenas’ lleva a los llectores d’Asturies.com a creer conveniente una moción de censura contra Rajoy. El popular va comparecer nel Congresu'l xueves en plena 'Operación salida’.

Un 85 por cientu de los nuesos usuarios que votó nel ‘Conceyu Abiertu’ opina que, pese a que’l Partido Popular (PP) pue tumbar la moción pola so mayoría absoluta, la oposición debería de dar esti pasu pa obligar a comparecer a Mariano Rajoy. Mientres, un 12 por cientu considera lo contrario y un 4 por cientu votó pola opción ‘Nun sé’. Sicasí, mientres taba abierta esta encuesta, el presidente del Gobiernu estatal anunció que diba aldericar sobre la situación económica y financiera nel Congresu mañana, 1 d’agostu, fecha que llevantó polémica al ser una xornada na que muncha xente ta de viaxe y nes que les sos pallabres perderíen repercusión. Esta intervención va ser aprovechada pola oposición pa entruga-y sobre la so rellación con Luis Francisco Bárcenas, ex tesoreru del PP anguaño na cárcel por dellos delitos económicos.

Otra manera, yá ta abiertu un ‘Conceyu Abiertu’ nuevu. Nesta ocasión queremos conocer que valoración faen los nuesos llectores sobre’l Festival Arcu Atlánticu, certame que se ta celebrando estos díes en Xixón y que recibe una crítica dura por parte del PSOE llocal.