Los turistes de zones infestaes pola poliya van recibir información sobre esta plaga qu'afeuta'l país

Col oxetivu de que nun muevan pataca fuera de los conceyos con presencia del insectu.

La Conseyería de Desarrollu Rural y Recursos Naturales va adoptar midíes adicionales esti branu pa evitar el movimientu de pataca por parte de persones non residentes que visiten les zones declaraes infestaes por poliya guatemalteca (Tecia solanivora) n'Asturies. Asina s'alcordó mientres una xunta de coordinación que tuvo llugar ayeri en Madrid ente'l direutor de Desarrollu Rural y Agroalimentación, Jesús Casas; la direutora xeneral de Ganadería, Agricultura y Industries Agroalimentaries de la Xunta de Galicia, Belén María do Campo Piñeiro; y el direutor xeneral de Sanidá de la Producción Agraria del Ministeriu d'Agricultura, Valentín Almansa de Lara.

Les trés alministraciones implicaes nos llabores de desiniciu y control de la poliya guatemaliana convinieron reforciar la campaña informativa nos conceyos afeutaos énte la llegada de turistes que se produz mientres esta dómina. Tamién van recabar l’apoyu d'otres alministraciones implicaes, como los conceyos, pa siguir concenciando a la población del peligru grave de treslladar pataca mercada o regalada fuera d'estos conceyos.

Amás, les alministraciones van coordinar coles fuerces de seguridá una medría de los controles nes carretera. Los trés direutores analizaron les actuaciones desenvueltes hasta agora en cada país y, asina mesmo, reforciaron los instrumentos de collaboración nel control de la plaga, “dende'l convencimientu mutuu de que solo l'aición coordinada va asegurar tar en condiciones de poder erradicar la plaga”, afirmó Casas.

N'Asturies declaráronse en marzu zones infestaes pola Tecia solanivora cuatro conceyos completos: Castropol, A Veiga, Taramundi y San Tiso d’Abres, y delles tierres en Navia, Valdés, Cuideiru y Xixón, nun perímetru d’un quilómetru alredor de los focos alcontraos. La conseyería definió como zones tampón los conceyos de Tapia, El Franco, Cuaña y Villayón y la superficie de los conceyos de Navia, Valdés, Cuideiru y Xixón escluyida de la zona declarada como infestada, llista a la qu'a finales de mayu sumáronse Pravia y Muros.