Los tresportistes deciden el sábadu si continúen los paros anque munchos yá volvieron al trabayu

Fileres de coches nes gasolineres pa enllenar el depósitu col descuentu de 20 céntimos.

Vuelven poco a poco los camiones y furgonetes rotulaes a circular peles carreteres asturianes. L'asociación Cesintra, que sofitaba la fuelga del tresporte n’Asturies, decidió’l xueves dexar los paros. Tamién otres cooperatives del sector anunciaron que volvíen a dar serviciu pero subiendo les tarifes a los sos veceros pa nun tener que trabayar por baxo los costos.

Sicasí, la Unión Independiente de Transportistas Autónomos (UITA) mantién la convocatoria de paru, porque consideren que les midíes del Gobiernu son insuficientes. Asina, UITA va proponer que se caltenga la fuelga na asamblea que’l sábadu va celebrar la Plataforma por la Defensa del Transporte en una estación de serviciu de San Fernando de Henares, en Madrid.

Les consecuencies se traducen nel empleu. Esta selmana presentáronse siete espedientes de regulación de empleu y diez solicitudes de Ertes ETOP por mor de los paros nel tresporte. Amás, munches empreses van tardar en mover el material que nun se pudo treslladar dende l’entamu de la fuelga’l 14 de marzu.

Embotellamientos nes gasolineres

Na mañana d’esti vienres, los descuentos a los carburantes provocaben fileres de vehículos pa enllenar los depósitos. Delles gasolineres tuvieron problemes a la hora de cobrar p’aplicar el descuentu y dalgunes de Repsol tuvieron que zarrar al públicu.

La bonificación de 20 céntimos por llitru o kilo de combustible -de los que les empreses aporten 5 céntimos- entraba en vigor con polémica. Les estaciones de serviciu han de poner el dineru y nun toes tienen liquidez pa facelo, anque’l Ministeriu yá dixo qu’a partir del llunes van a recibir un adelantu tomando de referencia lo facturáu nel mesmu mes del añu pasáu.

Hasta'l 30 de xunu, el tique de compra ha de conseñar l’importe con impuestos, separtando’l preciu enantes d’aplicar el descuentu y dempués de facelo, amás del importe de la rebaxa y una referencia al real decretu llei. Al par, les grandes petroleres anunciaren descuentos adicionales d’hasta 29 céntimos dafechu.

Les otres midíes

Esta selmana, el presidente del Gobiernu, Pedro Sánchez daba anuncia de les midíes del plan de choque escontra les consecuencies xeneraes pola guerra n’Ucrania, que van durar hasta’l 30 de xunu. Amás de la baxada xeneral del preciu del carburante, un tope al preciu del gas, la creación d’un centru d’operaciones de ciberseguridá, y créitos ICO por valor de 10.000 millones d’euros pa la agricultura y ganadería -362 millones- y pa la acuicultura y la pesca -68 millones-.

Dientro d’esta partida tán tamién les ayudes al tresporte -1.050 millones en total- y pa les industries consumidores de gas. Sicasí la mayoría de les empreses asturianes de los sectores de la siderurxia, metalurxia, química, cementos o alimentación, nun van poder beneficiase d’estos 125 millones d’euros.