Los trés posibles casos de coronavirus n’Asturies queden descartaos y analízase un cuartu

|
HUCA

Les pruebes prauticaes a les trés persones con síntomes que pudieren pensar que se contaxeren col COVID-19 dieron negativo y ta n’estudiu un cuartu casu. La Conseyería de Salú actualizó recién el protocolu p’afaelu a la realidá nueva del coronavirus, con presencia n’Europa tres los casos d’Italia ente un alarmismu escesivu.

Esta madrugada descartáronse los dos casos sospechosos nuevos, que se sumaba al del llunes. Les persones foron atendíes nel Hospital Universitariu Central d'Asturies (HUCA) tres activase’l protocolu d'actuación, al presentar fiebre y síntomes respiratorios depués de regresar de viaxe nes zones afeutaes d'Italia.

El Llaboratoriu de Viroloxía del HUCA procesó les muestres que dieron negativu al coronavirus nuevu y positivu pa otres infecciones respiratories. Agora ta pendiente d’análisis un posible cuartu casu, una muyer de Siero de mediana edá que tamién tuviera per Italia.

El procedimientu nuevu, alcordáu ayeri nel Conseyu Interterritorial celebráu en Madrid, amplía'l criteriu epidemiolóxicu d'árees de riesgu: amás de China, son anguaño Xapón, Corea del Sur, Singapur, Irán y la zona norte d'Italia (Vèneto, Lumbardéa, Emîlia-Rumâgna y Piemont). A les persones que tuvieren en dalgún d’estos llugares y que presenten los síntomes respiratorios, tos o fiebre, encamiéntase-yos llamar al 112 pa que-yos valore’l casu concretu y, si fora necesario, van ser trelladaos a un centru sanitariu.

Ente l’alarmismu creciente alredor del coronavirus que tuvo’l so orixe en Wuhan, hai que recordar que nun tien una mortalidá mayor que’l gripe común, que causó 15 muertos esti iviernu n’Asturies. El casu más cercanu de COVID-19 confirmáu hasta agora diose en Madrid.

Conseyos

Les autoridaes sanitaries recuerden que les midíes xenerales de prevención pal COVID-19 son les mesmes que pa otros virus respiratorios. El llaváu frecuente de les manes con agua y xabón ye una de les midíes más eficaces pa evitar los contaxos, y en casu de tusir o espirriar hai qu’usar pañuelos desechables d'un solu usu pa tapase la boca o la nariz, o bien el buecu del coldu pa evitar contaminar les manes.

Contador Estadistiques