Los traxes d'aldeana y porruanu declaraos Bienes d'Interés Cultural

L'Executivu aprobó dellos decretos polos que se declaren nuevos bienes d'interés cultural (BIC), la máxima categoría de protección patrimonial. 

Fueron declaraos bienes d'interés cultural inmaterial los traxes d'aldeana y porruanu llaniscos, portadores d'un altu valor simbólicu y identitario, dende'l caltenimientu de les conocencies tradicionales qu'apurren les técniques de la so ellaboración hasta'l papel que tienen en diversos rituales ceremoniales.

El palaciu de Sorribes, en Cazanes (Villaviciosa), que la so configuración actual constitúi un destacáu exemplu d'arquitectura civil señorial de dómina moderna, ye dende agora BIC na categoría de monumentu. Alcontráu n'una fastera del monte Coroña, ta arrodiáu por praos y tien el monte de La Carbayera venceyáu a la propiedá.

Tamién s'aprobó la declaración de BIC en categoría de sitiu históricu de dolce campos d'ilesia nos que coincide la vinculación directa d'un texu con un elementu de patrimoniu cultural material. Los espacios protexíos son los siguientes:

• Campu venceyáu a la ilesia de Santolaya d'Abamia, nel conceyu de Cangues d'Onís.
• Campu venceyáu a la ilesia de San Pablo d'Arangas, en Cabrales.
• Campu venceyáu a la ilesia de San Xuan de L'Abadía Cenero, en Xixón.
• Campu venceyáu a la ilesia de San Pedro de La Collá, en Siero.
• Campu venceyáu a la ilesia de La Purísima Concepción de Martul, en Vilanova d'Ozcos.
• Campu venceyáu a la ilesia de San Xuan Bautista de Montoubo, en Balmonte.
• Campu venceyáu a la ilesia de Santolaya de Pirueño, en Quirós.
• Campu venceyáu a la ilesia de San Blas de Vegadouria, en Rozadas, Boal.
• Campu venceyáu a la ilesia de San Martín del Mar, en Villaviciosa.
• Campu venceyáu a la ilesia de San Martín de Salas, en Salas.
• Campu venceyáu a la ilesia d'El Carmen de Santa Coloma, n'Ayande.
• Campu venceyáu a la ilesia de San Xuan de Santibanes de la Fonte, n'Ayer.

Dientro de la categoría de bien mueble declaráronse BIC n d'once órganos históricos dataos ente 1678 y los primeros años del pasáu sieglu.  Estos son los órganos qu'entren na llista:

• Dos órganos de la ilesia de Corias, en Cangas, de 1758 y 1889.
• L'órganu de Cuadonga, de finales del sieglu XVIII.
• L'órganu de la basílica de Llanes, de 1925.
• L'órganu de la ilesia parroquial de L.luarca, de 1923.
• L'órganu de la ilesia de San Isidoro, n'Uviéu, de 1678.
• L'órganu de la catedral d'Uviéu, de 1903-1905.
• L'órganu de Santa María La Real de la Corte, d'Uviéu, de 1705.
• L'órganu de la colexata de Pravia, de 1781.
• L'órganu de Puertu de Vega, en Navia, del sieglu XVIII.
• L'órganu de Santa María de Valdediós, de 1713.

Con esos decretos aprobaos, L'Executivu asumió l'informe favorable del plenu del Conseyu de Patrimoniu Cultural d'Asturies, qu'abrió los trámites a finales de 2016.

Dende Asturies.com queremos recordar esta galería de semeyes del traxes d'aldeana y porruanu, qu'asoleyamos l'añu pasáu.