Los trabayos arqueolóxicos en San Salvador de Curniana céntrense na cocina y la despensa del monasteriu

La investigación arquelóxica nel monasteriu de San Salvador de Curniana nun apara. Los trabayos últimos centráronse na cocina y despensa del edificiu, escavaciones que van permitir revelar aspeutos de la economía doméstica de los monxos.

Les investigaciones realizáronse nos meses de xunu y xunetu baxo direición del arqueólogu Alejandro García Álvarez-Busto. Esti tipu de dependencies menores corrieron peor suerte que los templos o los refectorios, tres l'abandonu de munchos monasterios mientres el sieglu XIX, polo que resulten más desconocíes y enigmátiques, anque nel casu del cenobiu salense caltiénense los vestixos arqueolóxicos de la cocina y de la despensa tal que foron reformaes nel sieglu XVIII, polo que l’análisis ientíficu afayadizu va permitir algamar información al rodiu de cómo yera la economía doméstica del monasteriu naquella dómina.

“Esisten una serie de dependencies, como la cocina, la bodega o la despensa que, anque de menor entidá arquiteutónica, tienen gran valor pa informanos de cómo yeren les condiciones de vida de los monxos y los sos criaos”, esplicó Otilia Requejo, direutora xeneral de Patromoniu Cultural. Mientres los trabayos identificáronse na cocina la pila d'agua corriente, les cañeríes de barru poles que se conducía l'agua, los fogones onde se cocinaba y el pasaplatos pol que s'introducíen les escudielles cola comida nel refectoriu.

Los espertos consideren el muestréu realizáu de los residuos calteníos nel suelu empedráu de la cocina lo más interesante de los trabayos, restos qu'anguaño tán en procesu d'análisis nel llaboratoriu, y a partir de los que va poder llograse una idea de cómo afaenaben los monxos y criaos na cocina.

Indicaciones escrites nuna parede de la despensa

La despensa, pela so parte, ye una sala zarrada y escura que namás ta comunicada col refectoriu y na que s'identificó un podiu nel que s'atopen encaxaes delles tinaxes de tamaños distintos.La hipótesis de partida ye que nel so interior almacenábense distintos productos.

Mientres los trabayos tamién se recoyeron amueses de restos xuntaos a les tinaxes que van revelar qué alimentos guardaben los monxos na so despensa. Nuna de les paredes del llugar caltiénense, amás, indicaciones escrites de la capacidá d'almacenamientu n'arrobes, unos restos que los arqueólogos consideren “especialmente relevantes”.

Los distintos materiales arqueolóxicos recuperaos nel trescursu de les escavaciones (cerámiques, ferramientes, oxetos suntuarios, etc.) tán siendo estudiaos. “En cuestión de selmanes esperamos cuntar con resultaos de los análisis de llaboratoriu efectuaos pola Universidá d'Uviéu”, esplicó Requejo.

Na semeya, indicación atopada nuna de les paredes de la despensa del monasteriu.