Los trabayadores de la normalización llingüística critiquen la so ausencia na Comisión sobre l'asturianu

|

"Ye sintómaticu y frustrante", apunta l'Asociación de Trabayadores de la Normalización Llinguística (ATNL) sobre l'ausencia de representantes del coleutivu na Comisión sobre l'asturianu. "La política asturiana sigue ensin dar importancia al trabayu que venimos desenvolviendo dende hai 15 años", afirma.

Asturies.com espublizaba esti vienres el llistáu completu de comparecientes pautaos poles formación polítiques pa participar nuna sesión prevista na Xunta Xeneral pola Comisión Especial d'Estudio sobre'l Réxime de Proteición y Promoción del Asturianu conocer la opiniones y esperiencia d'espertos y profesionales venceyaos cola llingua asturiana y otros idiomes asemeyaos cola fin d'ellaborar una conclusión que sirva pa la redaición definitiva del Plan de Dignificiación del Asturianu. Nél nun ta nengún representante de la normalización llingüística, asina como maestros de Llingua Asturiana y Gallego-asturiano, dalgo que tamién tuvo repercusión nes redes sociales tres conocese la noticia.

"Nun somos quien a entender cómo de 38 comparecientes, onde hai 10 respresentantes de la Universidá d'Uviéu, 5 de la música asturiana, 6 responsables d'empreses asturianes y una montonera profesionales del ámbitu asturianu, nun hai nengún representante del únicu colectivu de trabayadores profesionalizáu na normalización social del asturianu n'esclusiva, como somos los representantes de los Servicios de Normalización Llingüística", llamenten dende l'ATNL. Entienden que "una Comisión como ésta na que nun se va poder tratar nin afondar nos problemes reales de la normalización social de la llingua asturiana y eonaviega, paeznos que ye un error y ye nun querer ver ún de los caminos más claros onde facer política llingüística que realmente sirva pa falar d'un procesu de recuperación de los idiomes d'Asturies".

Por último, los trabayadores de la normalización llingüística quieren recordar que "tamos siempre a disposición de los partíos políticos p'avanzar y collaborar nun modelu de política llingüística que de verdá sirva pa recuperar la llingua asturiana y eonaviega. El facenos invisibles nun fai otru que danos más gana de trabayar nel ámbitu que tien la mayor cercanía cola xente como ye'l de los conceyos".

Contador Estadistiques