Los trabayadores d'Izar tomaron el centru de Xixón

Los trabayadores del astilleru Izar Xixón protagonizaron esta mañana una xornada de protesta contra'l prealcuerdo de privatización de los astilleros civiles con una manifestación qu'anduvo'l centru de Xixón y que causó retenciones na circulación pola instalación de barricaes con cubiertes a les que-yos prendieron fueu.

La protesta de los trabayadores del astilleru públicu de la ciudá vien dempués de que la policía espulsare ayeri domingu a los 150 obreros que dende'l 29 de mayu pasáu taben trancaos nel buque hospital "Juan de la Cosa" esixendo la venta conxunta de tolos astilleros del grupu Izar y en refuga al alcuerdu firmáu polos sindicatos CCOO y UXT cola Sociedá Estatal de Participaciones Industriales (SEPI) pol que se permitía la vienda per separáu de los astilleros qu'iguaben l'antiguu grupu públicu IZAR.

El secretariu del comité d'empresa d'Izar Xixón, René Rodríguez, de CCOO, afitó la "voluntá de siguir cola llucha na cai" de la plantiya y dixo que la operación policial pa echalos del barcu ocupáu foi "desmesurada y franquista" y que la empresa tien intención de declarar el pieslle patronal si siguen coles protestes dientro de la fábrica.