Los trabayadores del metal van dir a la fuelga los díes 20 y 21 pa desbloquiar el conveniu

Más de 20.000 trabayadores de 1.250 empreses del metal tán llamaos a la fuelga los díes 20 y 21 d’esti mes pola “intransixencia empresarial”. Con esti parón, los sindicatos quieren desbloquiar les negociaciones pol conveniu del seutor.
 
Les movilizaciones van principiar el 16 d'esti mes con una concentración frente a la sede de la patronal, Femetal, y la convocatoria posterior de les dos xornaes de fuelga. “Trátase d’acabar con un bloquéu de les negociaciones que nun tien razón de ser”, destacaron güei los llíderes de les federaciones del metal d'UXT y CC OO, Eduardo Donaire y Maximino García. En rueda prensa dambos dirixentes esplicaron les razones que los lleven a convocar unes protestes que “de nenguna manera buscaben los sindicatos”. “Nós llamentamos esta situación. Nun queremos facer fuelga porque ési nun ye'l nuesu oxetivu. Son otros los que xeneren eses protestes que pueden conllevar inestabilidá social”, esplicó García, que dexó claro que “los que piensen que los trabayadores nun van tener capacidá de rempuesta ante eses situaciones intransixentes de la patronal, tán bien equivocaos”.
 
Darréu, Donaire aseguró que la patronal del metal namái quier falar d'un alcuerdu de rentes y dexen fuera de la negociación toes eses cuestiones que defenden en públicu, tal como la implantación de la figura del aprendiz o la potenciación de la formación pa fidelizar a los emplegaos. “Creo que tamos ante un asuntu políticu porque la patronal asturiana paez la punta de llanza de la intransixencia y el talibanismu empresarial”, dixo’l secretariu xeneral de la Federación del Metal, Construcción y Afines d’UXT, que vinculó l’actitú de Femetal a la rotura de les negociaciones ente sindicatos y CEOE a nivel estatal.
 
Asina, Donaire llamentó que “mientres que n'Asturies siempre se llegara a alcuerdos, d’unos años p’acá nun sía asina”, y criticó l'actitú del presidente de la patronal asturiana, Severino García Vigón. “Yo lleí delles declaraciones suyes nes que se muestra como’l más radical a la hora de llegar a alcuerdos. Nun sé si se debe a que quería ser el presidente de la CEOE y nun lo llogró o qué”, concluyó Donaire.
 
Los sindicatos piden nesti conveniu una xuba salarial “sobre’l 3 por cientu o’l 2,25 por cientu porque creemos que la situación lo permite”. Mentes, los empresarios ponen sobre la mesa una medra salarial del 0,25 por cientu al 0,50 por cientu pal 2011, lo que supón “una media de 8 euros al mes en sueldos d'unos 1.000 o 1.200 euros”, frente a la xuba del 3 por cientu del conveniu d’ArcelorMittal, el 5 por cientu de los 3.000 trabayadores d’auxiliares o’l 1,9 por cientu firmáu nel conveniu del automóvil.