Los trabayadores de normalización llingüística esixen la reapertura del serviciu de Mieres

L'Asociación de Trabayadores de la Normalización Llingüística (ATNLL) reclama al Conceyu de Mieres y a la Conseyería de Cultura y Política Llingüística la reapertura del serviciu mierense. Ésti nun tien actividá dende’l 31 d’agostu.
 
Dende esti coleutivu aseguren nun entender “por qué unos conceyos, contando cola mesma financiación, caltienen el Serviciu de Normalización Llingüística abiertu tol añu mientres que'l de Mieres sufre añu tres añu la desconsideración, dexadez y falta de compromisu de los y les responsables municipales y, al empar, del Principáu d'Asturies”. La organización critica que "la Direición Xeneral de Política Llingüística conceda sovenciones” pa estos servicios y llueu “nun garantice'l so funcionamientu l'añu enteru y nin siquiera lleve un control de cuála ye la política llingüística que se desenvuelve nesi conceyu".
 
L’ATNLL considera que ye “vergonzoso” que’l Serviciu se mantenga peslláu, pero “más vergonzoso ye que la Direición Xeneral de Política Llingüística nun dea soluciones, cuando de contino pretenden vendenos el so apueste pola normalización”. Por ello, el coleutivu de trabayadores esixe “l'apertura del Serviciu de Normalización Llingüística de Mieres nunes condiciones que garanticen la so estabilidá y continuidá col oxetivu de que la normalización social del asturianu seya un procesu activu y participativu y non como se vien desarrollando nesti conceyu”, onde se permite que tea en funcionamientu “seis meses al añu, col preste de la Conseyería de Cultura”.