Los trabayadores de La Vega dan “por perdida la batalla” y amuesen el so descontentu colos políticos

|

“O mos engañaron o son unos inútiles”, dixo Mariano Fernández, presidente del comité d’empresa de La Vega sobre los políticos asturianos pol treslláu imparable de la fábrica a Trubia. Los trabayadores yá dan “por perdida la batalla”.
 
Fernández culpó a los responsables políticos, dende l'alcalde d'Uviéu, Agustín Iglesias Caunedo, hasta'l presidente del Gobiernu asturianu, Javier Fernández, pasando pel delegáu del Gobiernu estatal n’Asturies, Gabino de Lorenzo, de nun facer nada pa evitar el treslláu de les instalaciones de La Vega a la factoría de Trubia, decisión tomada por General Dynamics, dueña de les dos plantes. El representante sindical, que tuvo acompañáu na rueda de prensa por Jesús María López, secretariu d'Organización de MCA-UXT na fábrica, considera’l treslláu "un fechu", porque "a la vuelta de les vacaciones, en setiembre, el 80 por cientu de la plantiya va tar trabayando en Trubia", y el 1 de payares "nun va quedar nin un solu trabayador en La Vega". Sicasí, afirma que'l "supuestu" treslláu "va ser de personal, pero non de maquinaria", yá que "al ritmu que se ta llevando ye imposible que se cumplan plazos". Recuerda amás qu'hai máquines de precisión "que nun se tán treslladando de manera correuta, si se pretende que tean operatives en Trubia".
 
El presidente del comité afirma que los trabayadores siéntense "defraudaos". "Nun entendemos, si de verdá había un consensu de toles fuercies polítiques, qu'una empresa con tanto calao políticu como General Dynamics tome esta decisión", señala, pa recordar de siguío que los contratos precisen autorización del Gobiernu. Recuerda amás que l’intentu anterior de treslláu, va trés años, torgóse precisamente pola oposición de los grupos políticos. "O mos engañaron o son unos inútiles", señala.
 
Nesi sen, cree que los políticos apoyáronlos "namás de boca” y criticó a l'alcalde d'Uviéu, Agustín Iglesias Caunedo, al que recuerda que tanto'l Ministeriu de Defensa como la empresa diben ponese en contactu con él pronto; a los diputaos de la Xunta Xeneral, yá que los alvirtieron “de la urxencia nel tiempu d'un posicionamientu políticu claru en defensa del patrimoniu industrial, somorguiáronse nun debate parllamentariu sobre La Vega cuando la empresa yá taba executando l'esmantelamientu de la fábrica"; el conseyeru d'Industria y Emplegu, Graciano Torre, "que va tener l’honor dudosu de ver reflexao nel so currículu políticu la desapaición del sector aeronáuticu y armamentísticu"; al delegáu del Gobiernu estatal, Gabino de Lorenzo, al que reprocha que nel so día se posicionara "firmemente" sobre La Vega, y agora "va firmar" el vistu bonu definitivu al treslláu; y al ministru d'Industria, yá que "nun periodu non mui llargu vamos poder ser testigos de la xuba de los presupuestos de Defensa y namás nos va quedar llamentanos d'otra oportunidá perdida".
 
Na semeya, López y Fernández.

Contador Estadistiques