Los terrenos del HUCA vieyu acueyen una xornada solidaria coles neñes y neños saḥarauis

Conviden a participar a tola ciudadanía y a donar material escolar pa los campamentos de refuxaos saḥarauis nel desiertu.

'Truébano solidariu' ye'l nome d'esta actividá qu'entama esta tarde la Plataforma SOS Viejo Hospital y coleutivos de sofitu al pueblu saḥarauis nel parque del Truébano, asitiáu nos terrenos onde taba l'hospital. La so intención ye celebrar una xornada de convivencia pa diversión de les neñes y neños saḥarauis que pasen el branu n'Asturies dientro'l programa 'Vacaciones en paz' y, al empar, recoyer material escolar que llevar a los campamentos de refuxaos. Los donantes van recibir, a cambiu, un llibru.

La hora prevista de comienzu d'esta aición solidaria ye les 16 hores, cola previsión de que s'allargue hasta les 20 hores. Nesti tiempu los presentes van poder disfrutar de xuegos tradicionales asturianos, musiques y bailles del Saḥara Occidental y una ḥaima onde poder tomar te o tatuase con ḥenna, amás de la proyeición d'un documental sobre la situación d'esti pueblu y de los sos presos políticos o la violación sistemática de Derechos Humanos por parte de Marruecos, y un alderique posterior.