Los téunicos continúen investigando les causes del accidente de Cabrales

Téunicos d’E.ON y la Policía Xudicial continúen investigando les causes del accidente de Cabrales que provocó la muerte d’una muyer de 77 años. Al mesmu tiempu, siguen los trabayos de desescombriu na zona afeutada.

"Foi una desgracia que naide quería qu'asocediera", manifestó güei l'alcalde de Cabrales, José Antonio Pérez, que tamién apuntó que “inda nun se sabe nada” sobre les razones que pudo causar l’accidente. Na nueche del miércoles pasáu, una rotura d’una canal d’agua de la llétrica E.ON provocó l'esbarrumbe d’un monte qu'afeutó a dos viviendes y dos queseríes na zona de Valdelabarca, causando tres feríos y la muerte d’una muyer.

Pel momentu, la compañía llétrica nun se pronunció de manera oficial sobre lo asocedío. Sicasí, l'alcalde diz que ta “en contautu permanente" con E.ON. "Tán faciendo los llabores de desescombriu y solucionando tolos problemes, con tolo que faiga falta", indicó. A la hora de falar d'indemnizaciones a los afeutaos pola riada, l'alcalde señala que "la empresa ta dispuesta a facer lo que faiga falta".