Los sones de la Navidá asturiana aporten a Grau

Aguilandos y villancicos asturianos protagonicen la cuarta xuntanza de grupos folclóricos y músicos del país na Casa Cultura.

El Conceyu de Grau y l'Archivu de la Tradición Oral d'Ambás entamen un añu más esta prestosa iniciativa que tolos años dexa pequeña la instalación cultural. Un total de 15 formaciones participen nesta ocasión nuna cita prevista pa les 19.30 hores d'esta tarde.

El llistáu de la IV Xuntanza Los Sones de la Navidá Asturiana ta compuestu por L'Andecha Folclor d'Uviéu, L'Artusu, Grupu Folclóricu Blimea, David A. Cárcamo, Dolfu Fernández, Ramsés Ilesies ya Xosé Ambás, Asociación Cultural Escontra'l Raigañu, La Fonte La Faya, Francisco'l Camín, Muyeres por Grau, Pandereteres de La Quintana de Xixón, Grupu Folclóricu Prau Llerón, Seis Riales, Vezos Astures y Xeitu Grupu Tradicional. Toos interpretarán cantares propios de la época navidiega, como aguilandos o villancicos.