Los socialdemócrates tornen a ganar en Suecia a pesar d'algamar el peor resultáu de la so historia

|
Los socialdemócrates tornen a ganar en Suecia a pesar d'algamar el peor resultáu de la so historia

El partíu ultraderechista SD, con orixe en formaciones neonazis, afítase como la tercer fuercia con un 17,6 por cientu de los votos.

El primer ministru Stefan Löfven, del Sveriges Socialdemokratiska Arbetareparti (SSA), resultó ganador de les eleiciones sueques a pesar de que la so formación algamó'l peor resultáu de la historia con un 28,4 por cientu de los votos col 99,8 por cientu del total escrutáu (nel 1911 sumó un 28,5 por cientu y nes anteriores un 31,2). El bloque de la izquierda De Rödgröna, nel que se sumen Miljöpartiet de Gröna y Vänsterpartiet, esto ye, ecoloxistes y comunistes, de manera respeutiva, va siguir teniendo mayoría frente'l de centroderecha Alliansen (144 escaños por 143), anque ta por ver si Löfven podrá siguir nel cargu al necesitar apoyos nel restu del arcu parllamentariu.

Moderata Samlingspartiet, con Ulf Kristersson al frente, foi'l segundu partíu más votáu con un 19,8 por cientu del total (23,2 nel 2014), mentes que como terceros repinten los ultraderechistes del Sverigedemokraterna (SD), lideraos por Jimmie Akesson, con un 17,6 por cientu de los votos, siendo la formación que más aumenta, con una medra de 5 puntos (12,9 nel 2014). P'acceder al Gobiernu, Kristersson necisitaría l'apoyu de los ultraderechistes, opción que refugara enantes d'unes eleiciones que destacaron pola alta participación: 84,4 por cientu.

Na semeya, Löfven. Semeya obra de New Oresund baxo llicencia CC BY 2.0.

 

Contador Estadistiques