Los sindicatos sanitarios llamenten qu’UXT “falte al so compromisu” al aceptar la ufierta del SESPA

CC OO, SATSE, USAE, SICEPA-USIPA fixeron públicu un comunicáu nel que llamenten qu’UXT “falte al so compromisu” al aceptar la ufierta del SESPA, rompiendo asina la xunidá d’aición sindical. Dicen tar satisfechos pol resultáu de la fuelga.

“L’anuncia del sindicatu UXT de tar dispuestos a firmar un alcuerdu que ponga fin a la fuelga sanitaria si’l SESPA torna a poner enriba la mesa la propuesta última que presentara, supón un revés importante, pola confusión que pudiera crear, a la movilización que ta en marcha. Falten al so compromisu col restu d’organizaciones de mantener la xunidá d’aición necesaria, faen de manera sorpresiva l’anuncia de les sos intenciones ensin comunicales previamente al restu d’organizaciones sindicales y, lo que ye peor, provoquen un efeutu desmovilizador que nun mos queda otru remediu que superar”, critiquen nel comunicáu. Sicasí, dicen desconocer tovía si UXT mantién o non la convocatoria de fuelga –que continúa güei– pal llunes y pal 6 de payares tres el pidimientu del sindicatu al Serviciu de Salú del Principáu d’Asturies (SESPA) d’una reunión nueva y de comunicar la so disposición a aceptar la propuesta fecha’l llunes dende l’organismu.

Pese a esta torga, los sindicatos sanitarios manifiesten “la nuesa intención firme de captener el procesu movilizador qu’aniciamos, al mesmu tiempu que facemos el correspondiente llamamientu al SESPA y a la conseyería pa que, d’una vegada, se sienten a negociar con verdadera voluntá de llegar a un alcuerdu”.  Al respeuto, apunten que dende’l Gobiernu “conocen la nuesa postura, saben que los que nos separta nun supón costu nengún pa les arques públiques”, y reclamen-y que ponga fin a un conflictu “que nadie desea”. Sobre’l resultáu de la fuelga, amuesen la so satisfaición pol so desarrollu al mesmu tiempu que piden a los trabayadores del SESPA que sigan sofitándola.